"Limonçik Əli” adı ilə məşhurlaşan tiktoker Əli İsmayıllı da “trend”ə qoşulub. Belə ki, o, idmançı görünüşü əldə etmək üçün qəsdən qulağını zədələyib və bunu sosial şəbəkələrdə paylaşıb.

Sumqayit.tv xəbər verir ki, tibb elmləri doktoru, professor Adil Qeybulla Demokrat.az-a açıqlamasında bu mövzuya toxunub. O bildirib ki, hər bir prosedurun öncədən müəyyən olunmuş məqsədi olmalıdır, xüsusilə də tibbi mahiyyət daşıyırsa:

“Bu cür prosedurlar mütləq tibbi cəhətdən əsaslandırılmalıdır. Qulaq seyvanı səslərin toplanması və istiqamətinin müəyyənləşdirilməsi üçün vacib orqandır. Doğrudur, insan qulağının imkanları bəzi heyvanlarla müqayisədə daha məhduddur. Lakin aşağı sinif heyvanlarda da müşahidə etdiyimiz kimi, qulaq seyvanının hərəkəti səsin istiqamətini və incə səsləri tutmaq baxımından mühüm rol oynayır”.

O deyib ki, bu səbəbdən qulaq seyvanının zədələnməsi eşitməyə müəyyən dərəcədə təsir göstərə bilər:

“Üstəlik, belə bir müdaxilənin orqanizm üçün faydasından çox ziyanı var. Prosedurdan sonra müxtəlif ağırlaşmalar yarana bilər. Buna qulağın zədələnməsi, damarların zədəyə məruz qalması, infeksiya, toxuma ölümü (nekroz) və s. aiddir. Bütün bunlarla yanaşı, qulağın bu cür zədələnməsi eşitmə qabiliyyətini də zəiflədə bilər. Məncə, bu tip müdaxilələr tibbi əsaslandırması olmayan, yəni əsassız prosedurlardır. Əgər insan bunu könüllü şəkildə etdirirsə, bu onun şəxsi qərarıdır. Lakin cəmiyyət olaraq insanları mümkün risklər barədə maarifləndirmək vacibdir ki, belə addımlardan çəkinə bilsinlər. Məqsəd kimisə qınamaq yox, insanları daha ağıllı və təhlükəsiz seçim etməyə təşviq etmək olmalıdır. Cəmiyyət üçün faydalı olan da məhz budur: insanlara bu riskləri düzgün və aydın şəkildə izah etmək”.

Qeyd edək ki, bir müddət öncə Rusiyada limon satmaqla sosial şəbəkələrdə məşhurlaşan Ə.İsmayıllı illər əvvəl Sumqayıt şəhərində də alverlə məşğul olub.

Bu gün, 20:54 4