Sumqayıtda hestasiya müddəti 27–28 həftə olan və çox aşağı çəki ilə doğulan üçəm körpələr həkimlərin nəzarəti altında yaşadılıb.

Sumqayit.tv xəbər verir ki, uzun müddət övlad sahibi ola bilməyən ailə üçün bu hamiləlik yeganə ümid hesab olunurdu. Ananın yaşı və hamiləliyin gedişi nəzərə alınaraq erkən doğum riski əvvəlcədən yüksək qiymətləndirilib.

Məlumata görə, hamiləliyin davam etdirilməsi üçün tibbi nəzarət aparılsa da, doğuş vaxtından əvvəl baş verib. Doğulan üçəm oğlan uşaqlarının çəkisi 1120 qram, 1180 qram və 920 qram olub.

Körpələr doğulduqdan dərhal sonra tibb müəssisəsinin yenidoğulmuşların reanimasiya şöbəsinə yerləşdirilib və xüsusi nəzarət altında müalicə olunublar.

Mütəxəssislərin sözlərinə görə, çox aşağı çəkili və vaxtından əvvəl doğulan körpələrin yaşadılması üçün peşəkar tibbi heyət və müasir avadanlıq mühüm rol oynayır. Belə hallarda hər saat və hər gün xüsusi diqqət tələb edir.

Bildirilir ki, aparılan müalicə və nəzarət nəticəsində körpələr kritik dövrü geridə qoyub və hazırda vəziyyətləri qənaətbəxş qiymətləndirilir. Onların yaxın günlərdə ailələrinə təhvil verilməsi planlaşdırılır.

Qeyd olunur ki, son illər ölkədə vaxtından əvvəl doğulan və aşağı çəkili körpələrin yaşadılması istiqamətində tibbi imkanlar xeyli genişlənib və bu sahədə uğurlu nəticələr əldə olunur.

16-03-2026, 18:33 61