Təcili tibbi yardım xidmətinin keyfiyyətinin yüksəldilməsi məqsədilə 25 yeni avtomobil bölgə xəstəxanalara təhvil verilib.
Sumqayıt TV-yə TƏBİB-dən verilən məlumata görə, bu tədbir təcili tibbi yardım xidmətinin maddi-texniki bazasının gücləndirilməsi məqsədilə həyata keçirilib. Yeni nəqliyyat vasitələri Sumqayıt, Gəncə, Şirvan şəhərləri ilə yanaşı Ağdaş, Abşeron, Lənkəran, Cəlilabad, Astara, Göyçay, Sabirabad, Saatlı, Zaqatala, Bərdə, Samux, Biləsuvar, Qax, Masallı, Qusar, Beyləqan, Şəki və Neftçala rayonlarının Təcili tibbi yardım bölmələrinə təhvil verilib.
İtaliya istehsalı olan "IVECO" markalı bu ambulanslar texniki spesifikasiyasına görə həm standart (sadə differensiallı), həm də reanimobil təcili tibbi yardım avtomobilləridir. Xəstələrə yerindəcə operativ və təxirəsalınmaz tibbi müdaxilə edilməsi üçün avtomobillərin daxilində ən müasir şərait yaradılıb. Belə ki, ambulanslar monitorlu defibrilyator, elektrokardioqraf (EKQ), pulsoksimetr, qlükometr, böyüklər və uşaqlar üçün AMBU dəstləri, portativ və stasionar oksigen sistemləri, mexaniki və elektrik aspiratorlar, vakuum xərək, onurğa taxtası, boyun və hava şinaları, larinqoskop, ilk yardım çantası və digər zəruri tibbi avadanlıqlarla tam təchiz olunub.
Sumqayıt TV
Bu gün, 09:30
9
