Bu günə qədər Afrikadan kənarda meymun çiçəyinə yoluxma ilə bağlı mindən çox fakt aşkar edilib. Yoluxmalar barədə 29 ölkədən məlumat alınıb, lakin həmin ölkələrdə ölüm halları olmayıb.
 
Sumqayit.tv BMT-nin rəsmi saytına istinadla xəbər verir ki, Ümumdünya Səhiyyə Təşkilatının (ÜST) baş direktoru Tedros Gebreyesus bu barədə Cenevrədə keçirilən brifinqdə açıqlamaq verib.
 
Onun sözlərinə görə, bir neçə qeyri-endemik ölkədə meymun çiçəyinin qəflətən yayılması belə güman etməyə əsas verir ki, bu xəstəlik müəyyən müddət ərzində sirkulyasiya edib, lakin bu prosesin nə vaxt başlanması məlum deyil.
 
Tedros Gebreyesus deyib: “Qeyri-endemik ölkələrdə meymun çiçəyinin yayılması riski realdır. ÜST-ni xüsusilə narahat edən budur ki, həmin virus uşaqlar və hamilə qadınlar da daxil olmaqla həssas qruplar üçün təhlükəlidir”. Lakin onun sözlərinə görə, hadisələrin bu cür inkişafının qarşısını almaq mümkündür.
 
ÜST yaxın günlərdə meymun çiçəyinə qarşı tibbi yardım, infeksiyaların profilaktikası və onlara qarşı mübarizə, vaksinasiyaya dair rəhbərlik və əhalinin müdafiəsi barədə əlavə tövsiyələr təqdim etməyi planlaşdırır.
 
Hazırda meymun çiçəyinə qarşı mübarizə üçün ÜST tərəfindən bəyənilmiş preparatlar və vaksinlər mövcuddur, lakin onların ehtiyatları məhduddur. ÜST bu preparatların ədalətli bölgüsü mexanizmlərini hazırlayır.
 
Bununla bərabər, ÜST meymun çiçəyinə qarşı kütləvi vaksinasiya aparılmasını tövsiyə etmir. Vaksinlərin əlçatan olduğu azsaylı yerlərdə onlardan əsas etibarilə tibb işçilərini və laboratoriya əməkdaşlarını qorumaq üçün istifadə edilir.
 
Xatırladaq ki, Azərbaycan Səhiyyə Nazirliyinin məlumatına görə, ölkəmizin ərazisində meymun çiçəyinə yoluxma ilə bağlı heç bir fakt qeydə alınmayıb.