"Rusiya ilə strateji münasibətlər Ermənistanın təhlükəsizliyinin əsas amillərindən biridir”.
Sumqayit.trv xəbər verir ki, bunu Ermənistanın Baş naziri Nikol Paşinyan bu gün parlamentə hökumətin yeni proqramını təqdim edərkən deyib.
"Ölkəmizin təhlükəsizliyinin arxitekturasının əsas amillərindən biri olan Rusiya ilə strateji əməkdaşlığı xüsusilə vurğulamaq istəyirəm. Ermənistan və Rusiya arasında dostluq, əməkdaşlıq və qarşılıqlı köməyin göstərilməsi, Ermənistan və Rusiya Silahlı Qüvvələrinin birgə qruplaşması haqqında sazişlər ölkəmizdəki 102-ci hərbi bazasının (Rusiyaya məxsus – red.) imkanlarını genişləndirməyə davam edir”, - deyə Paşinyan qeyd edib.

Bununla yanaşı, N. Paşinyan çıxışında Azərbaycan və Ermənistan arasında sərhədin demarkasiya və delimitasiya məsələsini də gündəmə gətirib. Onun sözlərinə görə, Azərbaycanla sərhədin delimitasiya və demarkasiyasına maksimum tez başlamaq lazımdır. 
"Təəssüf edirəm ki, yazda siyasi qalmaqal səbəbindən planlaşdırılan nəticəyə nail olmaq mümkün olmadı. Ermənistan-Azərbaycan sərhədinin bir neçə hissəsində qeyri-sabit vəziyyət bu proseslərin başlanması üçün ciddi təhlükədir”, - deyə Paşinyan vurğulayıb.
N.Paşinyan, həmçinin, Sovet xəritələri əsasında hər iki ölkənin qüvvələrinin güzgü effekti əsasında geri çəkilməli olduğunu bildirib.