Avropa Şurası Parlament Assambleyası Qolodomoru - 1932-33-cü illərdə Stalin rejimi tərəfindən Ukrayna ərazisində törədilən kütləvi aclığı Ukrayna xalqının soyqırımı kimi tanıyıb, həmçinin Rusiyanın Ukrayna xalqına qarşı yeni törətdiyi cinayətləri pisləyib.
Sumqayit.tv xarici agentliklərə istinadən xəbər verir ki, AŞPA-nın cümə axşamı Strasburqda keçirilən iclasında qəbul edilən qətnamədə “Rusiyanın Ukraynaya qarşı məqsədyönlü işğalçılıq siyasəti Ukrayna xalqını məhv etmək üçün əvvəlki cəhdin faciəvi xatırlatmasıdır” cümləsi yer alıb.
 Bu, əslində Qolodomorda rəsmi Moskvanın ittiham olunması anlamına gəlir.
“Bu mülahizələri nəzərə alaraq, Assambleya Qolodomoru Ukrayna millətinin, dilinin və mədəniyyətinin əsaslarını məhv etməyə yönəlmiş soyqırım aktı kimi tanımaq və onun qurbanlarının xatirəsini ehtiramla yad etmək qərarına gəlir”,-deyə sənəddə qeyd olunub.
AŞPA-nın qərarını məmnuniyyətlə qarşılayan Ukrayna prezidenti Vladimir Zelenski bunları yazıb: “Tarixi ədalətin bərpası və Qolodomor qurbanlarının xatirəsinin yad edilməsi Rusiyaya açıq siqnaldır: Moskvanın bütün keçmiş və indiki cinayətlərinə görə ədalətli cəza alması qaçılmazdır”.
Qolodomor - 1932-1933-cü illərdə Sovet hökuməti tərəfindən həyata keçirilən taxıl tədarükü siyasəti və Ukrayna kəndlilərinin bütün ərzaq ehtiyatlarının müsadirə edilməsi nəticəsində baş verib. Həmin vaxt Ukraynada kütləvi qıtlıq və aclıq bütün ölkəni bürüyüb, hətta əhali arasında kanibalizm halları müşahidə olunub.
Aclıq nəticəsində ən azı 5 milyon insan öldü, lakin dəqiq rəqəmlər məlum deyil. Bir çox tarixçilər həmin aclıq siyasətinin Sovet hakimiyyətinin Ukrayna ərazisində qəsdən təşkil etdiyi fikri ilə  razılaşır. Ukrayna Ali Radası 2006-cı ildə Qolodomoru soyqırım kimi tanıyıb.
//Musavat.com