“Rusiya və Ukrayna arasında hərbi münaqişəyə razılaşma olmadan son qoymaq heç bir ölkənin maraqlarına uyğun deyil”.
Musavat.com “lenta.ru”ya istinadən xəbər verir ki, bunu Dövlət Dumasının Beynəlxalq əlaqələr komitəsinin sədr müavini Svetlana Jurova deyib.
Hərbi əməliyyatların hüquqi sənəd olmadan dayandırılmasının mümkünlüyündən danışan S.Jurova qeyd edib ki, bu, dünyada heç kimin marağına uyğun deyil:
“Fələstin-İsrail münaqişəsi kimi ocaq bizim nəyimizə lazımdır? Orada bir müddətlik razılaşma olur, geniş miqyaslı olmasa da, imza atırlar. Hər zaman “yatmış vulkandır”, bir dəfə püskürür, sonra sönür. Bu, kimə lazımdır?
Hər iki ölkənin maraqlarını nəzərə alaraq sərhədlərlə və ümumiyyətlə, bütün məsələlərlə bağlı birdəfəlik qərar verməli və müqaviləni imzalamalıyıq. Yalnız bu kontekstdə mövzuya qayıtmamaq mümkündür. Əks halda, gələcəkdə hər zaman bununla manipulyasiya və spekulyasiya etmək istəyən olacaq”.
Ukrayna Baş Kəşfiyyat İdarəsinin rəhbəri Kirill Budanovun NV-yə verdiyi məlumata görə, Kiyev hətta müharibə bitdikdən sonra da Moskva ilə sülh müqaviləsi imzalamaya bilər. Onun fikrincə, tərəflərin bütün şərtləri razı salması çox vaxt aparacaq və bu, onilliklər çəkə bilər.
Budanov Rusiya-Yaponiya münasibətlərini misal çəkib:
“Tarixdə elə hallar var ki, dövlətlər arasında uzun müddətdir davam edən müharibələr hüquqi cəhətdən başa çatmayıb. Məsələn, Rusiya və Yaponiya, 1945-ci ildən sonra onlar hələ də şimal adaları ilə bağlı sülh müqaviləsi imzalamayıblar. Bu ərazi problemi 70 ildən çoxdur mövcuddur. Ona görə də bu ssenarinin təkrarlanma ehtimalı yüksəkdir”.