Sumqayit.tv xəbər verir ki, 44 saylı Sumqayıt üçüncü seçki dairəsinin Milli Məclisdəki təmsilçisi, deputat, Mehriban Vəliyeva Oxu.Az-ın sorğusuna cavab verərək 2025-ci ilin ən yaddaqalan və mühüm hadisələrini dəyərləndirib.

Deputat qeyd edib ki, Azərbaycanın siyasi proseslərdə ardıcıl irəliləyişi, beynəlxalq müstəvidə nüfuzunun artması və mühüm tədbirlərə ev sahibliyi etməsi ilin diqqətçəkən məqamları olub:

“Xarici siyasət baxımından ilin ən mühüm hadisəsi, şübhəsiz ki, avqustun 8-də Vaşinqtonda keçirilən görüş idi. Çətin və mürəkkəb proseslər fonunda sülhə bir addım da yaxınlaşmaqda Azərbaycanın və Prezident İlham Əliyevin həlledici rolunu görmək hər bir vətəndaş üçün qürurvericidir. Bununla yanaşı, Konstitusiya və Suverenlik ili çərçivəsində Zəfərimizin 5 illiyinin və Konstitusiyamızın 30 illiyinin yüksək ruhla qeyd olunması tarixi əhəmiyyət daşıyan hadisələrdəndir. Dünyada davam edən münaqişələr fonunda ölkəmizin sabit, təhlükəsiz və dayanıqlı inkişaf yolunda irəliləməsi xüsusi vurğulanmalıdır. Qarabağın sürətli dirçəlişi milli qürur mənbəyimizdir. Eyni zamanda, Türk Dövlətləri Təşkilatı çərçivəsində Türk dünyasının beynəlxalq nüfuzunun artması və 15 dekabr tarixinin BMT tərəfindən Türk Dili Ailəsi Günü kimi təsis edilməsi də ilin mühüm siyasi-mədəni nailiyyətlərindəndir.”

Mehriban Vəliyeva əlavə edib ki, il ərzində müəyyən çətinliklər və neqativ hadisələr olsa da, onları ön plana çıxarmaq istəməyib:

“Çünki əldə olunan uğurlar və müsbət dinamika həmin mənfi məqamları kölgədə qoyur. Pozitiv hadisələrin üstünlük təşkil etdiyi bir ili geridə qoymuşuq.”

Deputat bildirib ki, Sumqayıt şəhərində seçicilərlə mütəmadi görüşlər keçirilir, daxil olan bütün müraciətlərə həssaslıqla yanaşılır:

“Müraciətlərin hər biri qanunvericiliyin tələblərinə uyğun şəkildə aidiyyəti qurumlara yönləndirilir və maksimum həllinə nail olmağa çalışılır. 2025-ci ildən əsas gözləntilərim təhlükəsizlik, əmin-amanlıq, sabitlik və davamlı inkişaf idi.”

O, bütün deputatları birləşdirən əsas arzu kimi sülhün tam bərqərar olması, təhlükəsizliyin təmin edilməsi, ölkənin sabit və dayanıqlı inkişafının davam etməsi və xalqımızın rifah halının yüksəlməsini vurğulayıb.

2-01-2026, 16:34 38