Sumqayıt şəhər 65 saylı körpələr evi-uşaq bağçasının tərbiyəçiləri Sevda Nəzərli, Validə Muradlı və Elmira İbadova  işlədikləri uşaq bağçasında əmək haqlarının kəsildiyini iddia edirlər.

Xeberle.com-a müraciət edən tərbiyəçilər bununla bağlı müvafiq orqanlara, o cümlədən Abşeron-Xızı Regional Təhsil İdarəsinə müraciət etdiklərini və verilən cavabın şikayətlə uyğun gəlmədiyini deyirlər.
Məsələyə aydınlıq gətirmək üçün Abşeron-Xızı Regional Təhsil İdarəsi ilə əlaqə saxladıq. İdarədən Xeberle.com-a bildirilbi ki,  qurumun tabeliyində olan Sumqayıt şəhər 65 saylı körpələr evi-uşaq bağçasının tərbiyəçiləri Nəzərli Sevda Fikrət qızı, Muradlı Validə Əvəz qızı, İbadova Elmira İsmayıl qızının sosial şəbəkələrdə paylaşdığı videogörüntülərlə bağlı məlumat daxil olub, araşdırma aparılıb: "Məlumat üçün qeyd edirik ki, 2004-cü il tarixinə kimi sözügedən uşaq bağçası 12 saatlıq iş rejimi ilə fəaliyyət göstərmişdir. Lakin sonradan Sumqayıt şəhər 65 saylı körpələr evi-uşaq bağçası daxil olmaqla, Sumqayıt şəhərində yerləşən bir neçə məktəbəqədər təhsil müəssisəsində ştat vahidində dəyişiklik edilmiş və iş saatı 10.5 saatlıq rejiminə keçirilmişdir.
Azərbaycan Respublikasının Nazirlər Kabinetinin "Büdcədən maliyyələşdirilən məktəbəqədər uşaq müəssisələrinin nümunəvi ştatı haqqında” 29 may 1996-cı il 61 saylı qərarı əsasən 5 günlük iş həftəsində 10.5 saatlıq iş qrafiki ilə fəaliyyət göstərən məktəbəqədər təhsil müəssisəsində 1.55 ştat vahidi tərbiyəçi nəzərdə tutulmuşdur. 
Bu günə qədər iş stajlarının çox olması nəzərə alaraq, həmçinin məzuniyyətdə olan tərbiyəçilərin əvəz edilməsi hesabına Nəzərli Sevda Fikrət qızı, İbadova Elmira İsmayıl qızı və Muradlı Validə Əvəz qızına 1.0 stavka üzrə əmək haqqı ödənilmişdir.
Qeyd etmək istərdik ki, Sumqayıt şəhər 65 saylı körpələr evi-uşaq bağçasının müdiri izahatında həmin şəxsin əvvələr də dəfələrlə bu şəkildə videolar çəkərək sosial şəbəkələrdə yerləşdirdiyini və müxtəlif qurumlara heç bir hüquqi əsası olmayan şikayət məktubları yazdığını bildirmişdir".