Sumqayıt şəhərində fəaliyyət göstərən ictimai nəqliyyat  10 aydır ki,  nağd ödənişə qaytarılıb. Ötən il sentyabrın 28-dən avtobuslarda kart sistemindən istifadə edilməsinə başlanılsa da, bu cəmi 54 gün çəkib.
Səbəb aidiyyəti qurumların 206 avtobus üçün aldıqları 210 validator aparatının nasaz və keyfiyyətsiz çıxması olub.
Gediş haqqını ödəmək istəyən sərnişinlərin kartından əsassız yerə pul çıxılıb, ya kartları bloklanıb, ya da ekranda işləmədiyi ilə bağlı məlumat göstərilib. Nəticədə yüzlərlə vətəndaşın cibinə ziyan dəyib.
Sumqayıtda avtobuslarda yenidən kart sisteminin tətbiqi bildirilsə də hələ də ictimai nəqliyyatda ödəmə "dədə-baba” üsulu ilə həyata keçirilir.
"Sumqayıt Nəqliyyat -1” MMC-də isə hələ də vəd verirlər
Sumqayit.tv-in məlumatına görə Qurumdan Xeberle.com-a bildirilib ki, kartla bağlı lazım olan avadanlıqlar üçün ödənişlər həyata keçirilərək sifariş verilib: "Marşrut sayı çox olduğu üçün sifarişlərin ölkəyə gətirilməsi və quraşdırılması vaxt aparan prosesdir. Yaxın vaxtlarda kart sisteminin bərpa olunması nəzərdə tutulub”.
Xədicə Səxavətqızı