Dünən Sumqayıt şəhərində yerləşən 2 saylı tam orta məktəbdə "İnsan alverinin qurbanına çevrilməyək" mövzusunda sözügedən məktəbin şagirdləri üçün maarifləndirici tədbir keçirilib.
Sumqayit.tv xəbər verir ki, "İnsan alverindən əziyyət çəkən yetkinlik yaşına çatmayanların təhsil, sosial-psixoloji reabilitasiya və ailələrin maarifləndirilməsi" mövzusunda tədbiri keçirilib. Sumqayıt şəhər Polis İdarəsinin Yetkinlik Yaşına Çatmayanlarla Profilaktik işin Təşkili şöbəsi, "Azərbaycan Uşaq Qaynar Xətt" xidməti, Abşeron-Xızı Təhsil İdarəsi və Sumqayıt şəhər İcra Hakimiyyətinin Gənclər və İdman şöbəsi təşkil edib. Tədbirin təşkilində məqsəd, tarixin hər dönəmində bəşəriyyət üçün bəlaya çevrilmiş insan alverinin qurbanına çevrilməmək və həssas qrupa aid olan şəxsləri bu təhlükədən uzaq tutmaq olub.  Sumqayıt şəhəri və ona bitişik ərazilərdə yaşayan əhali arasında, insan alverinin qurbanlarına çevrilməmək üçün  hüquqi və psixoloji dəstəyin göstərilməsinin vacibliyi təşkilatçılar tərəfindən prioritet mövzu kimi xüsusi vurğulanıb. İnsan alveri, məcburi əmək və onlara səbəb olan amilləri aradan qaldırmaqda dövlətin ciddi-cəhdlə çalışdığını və bu məsələdə vətəndaşların da ayıq-sayıq olmaları xüsusi vurğulanıb.  Belə xoşagəlməz halların baş verməməsi naminə yeniyetmə yaşında olan uşaqların və valideyinlərin əsasən nələrə diqqət etməli olduqları bir-bir izah edilib. Eyni zamanda işbazların özlərinə qurban tapmaq üçün ən çox hansı üsullardan istifadə etdikləri ardıcıllıqla şagirdlərin diqqətinə çatdırılıb. Belə işbazların toruna düşməməkdən ötrü, nələri bilməli və nələrə diqqət etməli olduqları təfsilatı ilə məktəbin şagirdlərinə aydınlaşdırılıb. Uşaqların belə xoşagəlməz vəziyyətlə qarşılaşdığı halda, dərhal DİN-in 102 və ya "Azərbaycan Uşaq Qaynar Xətt" xidmətinə 116111-ə müraciət etmələrinin vacibliyi vurğulanıb. Təşkilatçılar tərəfindən edilən tövsiyyələrə əməl olunması dönə-dönə xatırladılıb.
Tədbirə qatılanlara önləyici addımların görülməsi üçün  flayerlər və video-roliklər göstərilib.
Qeyd edək ki, Tədbirdə Sumqayıt şəhər Polis İdarəsinin "Yetkinlik Yaşına Çatmayanlarla Profilaktik İşin Təşkili" şöbəsinin inspektoru Asudə Əliyeva, Abşeron-Xızı Təhsil İdarəsinin metodisti Cəmilə Fəyyaz, 2 saylı tam orta məktəbin direktoru Xalid Adıgözəlov,  "Azərbaycan Uşaq Qaynar Xətt" xidmətinin və Sumqayıt şəhər İcra Hakimiyyətinin Gənclər İdman şöbəsinin əməkdaşları iştirak ediblər.