Bu gün daha bir şəhidimiz Emil Rasif oğlu Abduləzimlinin anım günü qeyd olunub. 
Sumqayit.tv xəbər verir ki, öncə şəhidin məzarı Şəhidlər Xiyabanında ziyarət olunub. Daha sonra isə “Kosmos” mərasim evində tədbirin davamı keçirilib. Mərasimdə şəhidin ailəsi, yaxınları, qazilər və digər şəhid ailələri iştirak ediblər. Hamı şəhidlərimizin əziz ruhunu 1 dəqiqəlik sükutla yad edib və müxtəlif himn, şeir və vətənpərvər ruhda mahnılar səsləndirilib. 
Xatırladaq ki, Emil Abduləzimli 6 dekabr 1994-cü ildə Zəngilan rayonunda anadan olub. O, Azərbaycan Silahlı Qüvvələrinin sıralarında bir müddət xidmət etmişdir və xidmətini bitirdikdən sonra mülki işlə məşğul olub. Azərbaycan Ordusunun əsgəri olan Emil Abduləzimli 27 sentyabr 2020-ci ildə Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsində qismən səfərbərlik çağırışına qatılmışdır. Emil Abduləzimli 19 oktyabr 2020-ci ildə Cəbrayıl döyüşləri zamanı həlak olub.
Ruhun şad olsun!
Müxbir: Vəsiqə Dadaşova