Bu gün 27.09.2020-ci il tarixində başlayan Vətən müharibəsi zamanı şəhid olan Azərbaycan Daxili İşlər Nazirliyinin Daxili Qoşunlarının baş çavuşu, yarımqrup komandiri, Allahyarov Vüsal Şakir oğlunun anım mərasimi keçirilib. 
Sumqayit.tv xəbər verir ki, şəhidimizin anım mərasimi Şəhidlər Xiyabanında məzarını ziyarət edilərək başlayıb, sonra isə xeyir-şər evlərinin birində ehsan süfrəsi verilərək davam edib. Tədbir şəhidlərimizin ruhlarına 1 dəqiqəlik sükutla və Azərbaycan Respublikasının Himni ilə başlayıb.  Mərasimə Hərbi Polis və Daxili Qoşunların numayəndələri Corat Bələdiyyə numayəndələri, 7 və 9 nömrəli məktəbin, eyni zamanda İdrak liseyinin kollektivi qatıliblar.
Bundan başqa "Mənim oğlum qəhrəmandır" layihəsinin rəhbəri Cəlal Qurbanov,  Sumqayıt Şəhər Cümə Məscidi axundu hacı Rauf, Corat Məscidinin axundu hacı Sahib şəhidin, qohumlar və digər şəhid ailələri mərasimə təşrif buyurublar. 
Xatırladaq ki, Vüsal Allahyarov 22.03.1988-i ildə Sumqayıt şəhərində anadan olub. Azərbaycan Daxili İşlər Nazirliyinin Daxili Qoşunlarının baş çavuşu olan Vüsal Allahyarov 27.09.2020-ci ildə Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Füzulinin və Şuşanın azadlığı uğrunda gedən döyüşlərdə savaşıb. Vüsal Allahyarov noyabrın 7-də Şuşa döyüşləri zamanı şəhidlik məqamına ucalıb. İlham Əliyevin sərəncamına əsasən Allahyarov Vüsal ölümündən sonra "Qarabağ" ordeni ilə, "Vətən uğrunda", "Şuşanın azad olunmasına görə" və "Füzulinin azad olunmasına görə" medalları ilə təltif edilib.
Ruhun şad olsun, Vətənimizin İgidi!

Jurnalist:Vəsiqə DADAŞOVA