"Sumqayıt" Premyer Liqanın XI turunda "Qəbələ" ilə heç-heçəyə razılaşdı (0:0). "Kimyaçılar" turnir cədvəlində 15 xalla 7-ci sırada qərarlaşıb.

"Sumqayıt"ın futbolçusu Oktavio Manteka "FutbolPress"ə açıqlamasında komandanın son oyunu haqda fikirlərini bölüşdü:

"Sabah"la iki ağır oyundan sonra hazırlaşmağa vaxtımız az oldu. "Qəbələ" ilə görüşdə müəyyən məqamlarda yorğunluq hiss olundu. Hər oyuna qələbə üçün çıxırıq. Azarkeşlərimizin də dəstəyi ilə yaxşı nəticə əldə etmək istəyirdik. Bu dəfə alınmadı, növbəti matçlarda onları sevindirməyə çalışacağıq".

Bu yay heyətə cəlb olunan yarımmüdafiəçi Azərbaycana uyğunlaşmasından və Premyer Liqanın səviyyəsindən söz açdı:

"Azərbaycanda özümü yaxşı hiss edirəm. Artıq bütün komandaları tanıyıram. Rəqiblərimizin gücünü bilirik, bizim də yaxşı komandamız var. Yuxarı sıralarda olmaq üçün əlimizdən gələni edəcəyik. Futbol dünyanın istənilən yerində futboldur. Düzdür, hər ölkənin özünəməxsus tərzi var. Azərbaycanı fərqləndirən stadionlar və azarkeşlərdir. Meydançaların bəzisi süni örtüklüdür. Bəzən oyunlara da az azarkeş gəlir. Bu mənada çempionat fərqlənir".

İspaniyalı futbolçu Sumqayıt şəhəri haqda təəssüratlarını da bölüşdü:

"Sumqayıt balaca, ancaq gözəl şəhərdir. Buradan xoşum gəlir. Ümumilikdə Azərbaycan çox yaxşı ölkədir. Hansısa mənfi fikrim yoxdur".

Oktavio bu yay Bolqarıstanın ÇSKA komandasından icarə əsasında "Sumqayıt"a keçib. O, Premyer Liqada 11 oyunda meydana çıxıb.