Xatırladaq ki, arena yerli icra hakimiyyətinin balansında olduğundan “Sumqayıt” dövlət qurumuyla danışıqlara başlamış və idman qurğusunun icarəyə götürülməsi istiqamətində ilk addımlarını atmışdı.
Məsələnin üstündən xeyli zaman keçdiyini və hələ də hansısa irəliləyiş olduğu haqda məlumatsızlığı nəzərə alıb, mövzuya yenidən qayıtdıq. Öncə stadionun rəhbəri Nadir Quliyevlə əlaqə saxlayıb son durum haqda bilgi aldıq. Bəlli oldu ki, danışıqlar artıq sona çatıb və tərəflər arasında sürpriz razılıq baş tutub. Detalları Nadir bəydən eşidək:
“İcra Hakimiyyəti ilə klub arasındakı müzakirələr müsbət sonluqla bitdi. Qərara alındı ki, stadion “Sumqayıt”a pay verilsin. Daha dəqiq desək, hansısa müqavilədən söhbət getməyəcək. Klub arenanı PFL və “CBC Sport”un tələblərinə uyğun hala salandan sonra premyer-liqa matçlarını burda keçirə biləcək. Artıq bu yöndə işlər görülməyə başlanıb. “Sumqayıt” icarəhaqqı vermədən stadionda oyunlarını keçirə bilər. Çox güman, ya Misli premyer-liqasınını 14-cü turundakı “Zirə” ilə qarşılaşma, ya da 16-cı turdakı “Qarabağ” matçı məhz burda baş tutacaq. Bütün tərəflər üçün xeyirli olsun. İnşallah, komanda burda çox sayda qələbə qazanıb sumqayıtlıları sevindirəcək”.
Mövzuyla bağlı “Sumqayıt”ın mətbuat xidmətinin rəhbəri Zaur Xudiyevin də fikrinin öyrəndik:
“Bəli, artıq razılıq əldə olunub. Müzakirələr rəhbərlik səviyyəsində aparılıb. Biz, sadəcə, oyungünü xərclərini, eləcə də stadionun PFL və “CBC Sport”un tələblərinə uyğun hala salınması üçün lazım olan vəsaiti ödəyəcəyik. Bəli, eşitdiyimə görə, əlavə icarəhaqqı ödəməyəcəyik. Artıq adını çəkdiyim qurumlar stadiona baxış keçirərərək təklif və iradlarını bildirib. Lazım olan işlərin planlanması və görülməsi istiqamətində iclas keçirib çalışmalara başlamışıq. Ümid edirəm ki, işlər tezliklə yekunlaşacaq. Lakin bu yöndə dəqiq tarix demək düzgün olmaz”.