“Sumqayıt” Premyer Liqanın XVI turunda qəbul edəcəyi “Qarabağ”a dörd ildir evdə qalib gələ bilmir.
Sumqayit.tv “report”-a istinadən xəbər verir ki, “gənclik şəhəri”nin təmsilçisi sonuncu dəfə 2019-cu ilin noyabrında doğma arenasında güclü rəqibindən 3 xal almağı bacarıb.
 
Həmin vaxtdan bəri Sumqayıtda baş tutan 6 qarşılaşmanın yalnız ikisində eyniadlı komanda heç-heçə edə bilib. Son dörd matçda isə “Qarabağ” rəqibini “quru” hesabla məğlub edib.
 
Bu komandalar arasında çempionatda baş tutan son 10 görüşün hamısında ağdamlılar rəqib qapısına yol tapmağa müvəffəq olublar. “Sumqayıt” axırıncı dəfə 2021-ci ilin fevralında öz meydançasındakı görüşdə (0:0) qapısının toxunulmazlığını qoruya bilib.
 
Ümumiyyətlə, “Qarabağ”la “Sumqayıt” arasında Premyer Liqada keçiriləcək 45-ci görüşöncəsi son çempion böyük üstünlüyə malikdir. 2011-ci ildən bəri təşkil olunan 44 qarşılaşmanın cəmi 6-da “kimyaçılar” qələbə üzü görüblər. Bunun da biri texniki qalibiyyət olub. Həmin beş matçın hər birində sumqayıtlılar minimal fərqlə rəqibi üstələyiblər. Əvəzində “Qarabağ” “gənclik şəhəri”nin təmsilçisini iki dəfə 6:0, iki dəfə 6:1, iki dəfə 5:0, bir dəfə 5:1, iki dəfə 4:0, iki dəfə 4:1, beş dəfə isə 3:0 hesabı ilə məğlub edib.
 
Komandalar indiyə qədər 5 dəfə heç-heçəyə razılaşıblarsa, “Qarabağ”ın hesabında 33 qələbə var. Vurulan qol sayında da nəzərəçarpacaq dərəcədə fərq var. “Sumqayıt” buraxdığı 108 topa cəmi 21 qolla qarşılıq verə bilib.
 
Qeyd edək ki, bu gün “Kapital Bank Arena”da keçiriləcək “Sumqayıt” - “Qarabağ” matçı saat 19:30-da başlayacaq. Hazırda ağdamlılar 32 xalla birinci, sumqayıtlılar isə 23 xalla üçüncü pillədə qərarlaşıblar.