Sumqayıt Apellyasiya Məhkəməsi Abşeron Rayon Məhkəməsinin qərarını ləğv etdi
Sumqayıt Apellyasiya Məhkəməsində qəsdən sağlamlığa az ağır zərər vurmada təqsirləndirilən Sabir Qasımovun (şərti) barəsindəki hökmdən verilən apellyasiya şikayəti üzrə məhkəmə iclası başa çatıb. Sumqayit.tv Pravda.az-a istinadən xəbər verir ki, sonuncu keçirilən prosesdə qərar elan olunub. Qərara əsasən, zərərçəkmiş şəxs tərəfindən verilən apellyasiya şikayətinə baxılmasına xitam verilib, Abşeron Rayon Məhkəməsinin çıxardığı hökm ləğv edilib və iş yeni məhkəmə baxışına qaytarılıb. İttihama görə, hadisə 09 mart 2024-cü il tarixdə, saat 01 radələrində Abşeron rayonu, Xırdalan şəhəri M.Hüseynzadə küçəsində yerləşən “Rahat Market”in qarşısında qeydə alınıb. Belə ki, Sabir Qasımov yeznəsi, zərərçəkmiş Tahir Tahirovla (şərti) mübahisə edib. Mübahisəyə səbəb isə zərərçəkmişin onun bacısından ayrıldıqdan sonra övladları ilə maraqlanmaması olub. Bu zaman Sabir çəkic, yumruq və ayaqla Tahirin bədəninin müxtəlif nahiyələrinə vuraraq ona xəsarət yetirib. Hadisədən sonra Sabir Qasımov saxlanılıb və barəsində başqa yerə getməmək haqqında iltizam qətimkan tədbiri seçilib. Abşeron Rayon Məhkəməsinin hökmü ilə ona 1 müddətinə azadlığın məhdudlaşdırılması (elektron qolbaq) cəzası təyin edilib.