Birinci Qarabağ müharibəsinin Qərbi Azərbaycan kökənli, Azərbaycan Bayrağı Ordenli şəhidi Hüseynov Akif Knyaz oğlunun şəhadətə qovuşmasından 31 il keçir. 
Sumqayit.tv xəbər verir ki,  bu münasibətlə şəhidin anası, qohumları, Azərbaycan Respublikası Milli Məclisinin deputatı Hicran Hüsynova, Qərbi Azərbaycan İcması Sumqayıt nümayəndəliyinin və Sumqayıt Qarabağ Veteranlar Şurasının üzvləri  Akif Hüseynovun Sumqayıt şəhərində quraşdırılan abidəsi önünə yığışıblar. 
A. Hüseynovun keçdiyi döyüş yolu, göstərdiyi qəhrəmanlıq barəsində şəhidin dayısı Alı Alıyev qonaqlara məlumat verib və gələn qonaqlara təşəkkürünü bildirib.. 
Sonra qəhrəman şəhidin abidəsi qarşısında çıxış edən deputat H.Hüseynova bildirib ki, bugünkü Azərbaycan qurban verdiyi şəhidlərinin sayəsində öz müstəqilliyini və dövlətçilik ənənəsini möhkəmlədə bilib. 
“Öz qəhrəman oğullarının şücaəti sayəsində Azırbaycan öz torpaq bütövlüyünə qovuşub. Qarabağ 27 illik işğaldan sonra erməni faşistlərindən xilas olunub. Hesab edirəm ki, əziz canlarını Qarabağın müdafiəsi üçün qurban verən şəhidlərimizin ruhu indi şaddır. Çünki, ölkəmiz onların sayəsində onillər ərzində həsrətdə qaldığı Qarabağa yenidən qovuşub.”- deyə, deputat fikirlərini tamamlayıb. 
Qərbi Azərbaycan İcması Sumqayıt nümayəndəliyinin sədri Ramiz İsmayılov, A.Hüseynovun anasına və yaxınlarına başsağlığı verərək bildirib ki, Azərbaycan var olduqca nə şəhidlərini, nə də şəhidlərimizin bizlər üçün əmanət qoyduğu ailə üzvlərini heç vaxt unudulmayacaq.