Müasir dünyada şəhərlərin imicinin formalaşdırılması, sadəcə infrastruktur və iqtisadi inkişafla deyil, həm də effektiv PR və marketinq strategiyaları ilə bağlıdır. Şəhərlər artıq brendə çevrilir, onları fərqləndirən kimlik və dəyərlərlə tanınmağa başlayır. Azərbaycan şəhərləri arasında Sumqayıt xüsusi diqqət çəkir – həm sənaye tarixi, həm Xəzər sahilində yerləşməsi, həm də sürətlə dəyişən sosial-iqtisadi mühiti ilə.

Bu mövzu ətrafında söhbətimiz PR və marketinq üzrə mütəxəssis, Sumqayıt sakini Abbasəli Hüseynovladır. O, Sumqayıtın gələcək potensialından, beynəlxalq platformada necə təqdim edilə biləcəyindən və şəhərin sakinləri ilə qurulacaq bağlardan danışır. Onun baxışı bir mütəxəssis kimi analitik, bir sumqayıtlı kimi isə ümidlidir.

Son zamanlar bir çox şəhərlərin beynəlxalq səviyyədə tatınmaq üçün yeni PR və marketinq addımları atdığını görürük. Sizcə, Sumqayıt bu baxımdan hansı potensiala malikdir?

- Əslində Sumqayıt çox nadir bir fürsətə malikdir. Çünki həm sənaye şəhəri olaraq keçmişi var, həm də Xəzərin sahilində yerləşməsi, təbiəti, insan resursu ilə gələcəyə doğru istiqamətlənə bilər. Məsələ burasındadır ki, bu imic və status yalnız tarixi və coğrafi mövqelə əsaslanmamalıdır – şəhər özünü necə təqdim edir, bu daha önəmlidir.

Maraqlıdır. Bəs sizcə, Sumqayıt necə təqdim olunmalıdır?

- Bunun üçün ilk növbədə brend kimlik yaradılmalıdır. Yəni, Sumqayıtı təkcə “sənaye şəhəri” kimi yox, “Gələcəyin şəhəri”, “İnnovasiya və Yaşıl Texnologiyalar mərkəzi” kimi təqdim etmək olar. Bu konsepsiya ətrafında loqo, sloqan, vizual stil yaradılmalıdır. Məsələn, 'Sumqayıt – Sənayenin gələcəyi', ya da 'Sumqayıt – Mavi səma altında yeni həyat' kimi sloqanlar işlək ola bilər.

Bəs bu konsepsiyanı necə reallaşdırmaq olar?

- Dünya təcrübəsindən nümunə götürə bilərik. Məsələn, Bilbao (İspaniya) vaxtilə köhnə sənaye şəhəri idi, indi isə mədəniyyət mərkəzidir. Guggenheim muzeyi bu şəhərin imicini tam dəyişdi. Yaxud Austin (ABŞ) əvvəllər sakit şəhər idi, indi texnologiya və musiqi festivalları ilə tanınır. Manchester (Böyük Britaniya) Sənaye şəhəri idi, indi isə musiqi, futbol və texnologiya ilə tanınır. Davos (İsveçrə) kiçik şəhər olsa da, Davos İqtisadi Forumu ilə dünyada tanınıb.

Sumqayıt üçün də 'Sumqayıt Future Forum', 'Urban Tech Festival', 'Xəzər Ekologiya Sammiti' kimi tədbirlər təşkil edilə bilər. Əgər Sumqayıtda hər il beynəlxalq tədbirlər keçirilərsə, bu, həm iqtisadi, həm də imic baxımından çox ciddi təsir yaradacaq.

Lokal səviyyədə, yəni öz vətəndaşları ilə necə bir əlaqə qurulmalıdır?

- Ən böyük səhv budur ki, bəzən şəhərin PR-ı sadəcə xarici auditoriyaya yönəldilir. Halbuki ilk növbədə şəhər öz sakinləri üçün maraqlı olmalıdır. Bunun üçün interaktiv platformalar yaradılmalıdır. Məsələn, “Sumqayıtı mən dəyişirəm” adlı platformada hər kəs ideya verə bilər. İctimai dizayn müsabiqələri, park layihələri, açıq sorğular təşkil olunmalıdır. Belə olan halda insanlar öz şəhərlərinə sahiblənirlər.

Sumqayıtda doğulmuş məşhurlar bu prosesdə necə iştirak edə bilər?

- Bu, çox vacib bir məqamdır. Məşhurlar və sənət adamları şəhərin “brend səfiri” ola bilərlər. Onların video çıxışları, sosial şəbəkələrdə şəhər haqqında xatirələri, “Mənim Sumqayıtım” layihəsi çox təsirli ola bilər. Məsələn, Seul şəhəri K-pop ulduzlarını rəsmi şəkildə şəhərin PR siması seçdi və bu, qlobal səviyyədə rezonans doğurdu. Şükürlər olsun ki, Sumqayıt da hər sahədə çox sayda ulduzlar yetişdirib.

Son olaraq, bir vətəndaş kimi Sumqayıtı necə görmək istərdiniz?

- Mən bir sumqayıtlı olaraq, yaşamaq üçün cazibədar, yaradıcı ideyaların doğulduğu, gənclərin geri qayıtmaq istədiyi bir şəhər kimi görmək istərdim. İmic və status dediyimiz anlayış, əslində hiss etdirilən dəyərdir. Əgər bu dəyəri düzgün təqdim etsək – həm dünya, həm də öz xalqımız Sumqayıtı tam fərqli gözlə görə bilər.

Çox təşəkkür edirik, bu baxış çox dəyərli idi.

Mən təşəkkür edirəm. Sumqayıt üçün böyük potensial var – yetər ki, onu planlı şəkildə göstərək.

Söhbətləşdi: Məleykə Xankişiyeva

Mənbə Sumqayit.tv

31-05-2025, 11:44 270