Sumqayıt şəhərində abadlıq və infrastrukturun yenilənməsi istiqamətində işlər davam etdirilir. Şəhər İcra Hakimiyyətinin təşəbbüsü və tapşırığı ilə Sumqayıt Bələdiyyəsi tərəfindən bu il ərzində genişmiqyaslı asfaltlaşdırma layihələri həyata keçirilir.

Sumqayit.tv-yə Sumqayıt Bələdiyyəsindən verilən məlumata görə, layihə çərçivəsində xüsusilə şəhidlərin adını daşıyan küçələrin yenidən qurulmasına önəm verilir. Belə ki, Corat bağları ərazisində yerləşən şəhid Mais Səmədov küçəsi, şəhid Məhəmməd Nadir Rzayev küçəsi, eləcə də Xəzri-2 yaşayış massivindəki şəhid Gəray Məmmədov küçəsi və şəhid Coşqun Zeynallı küçəsi yaxın günlərdə yeni asfalt örtüyü ilə təmin olunacaq.

Qeyd edək ki, layihələr çərçivəsində yol infrastrukturu müasir texnologiyalarla yenilənəcək, texniki göstəricilər və ekoloji təhlükəsizlik məsələlərinə xüsusi diqqət yetiriləcək. Küçələrin ölçüsünə uyğun olaraq asfaltlanma işləri mərhələli şəkildə həyata keçiriləcək.

Görülən tədbirlər şəhərin ümumi estetik görünüşünün yaxşılaşdırılması ilə yanaşı, vətəndaşların gündəlik həyat şəraitinin yüksəldilməsinə xidmət edir. Sakinlər bu təşəbbüsləri müsbət qarşılayır və şəhər rəhbərliyinə minnətdarlıqlarını bildirirlər.

Son illər ərzində Sumqayıtda onlarla küçə yenilənib, yüz minlərlə kvadratmetr əraziyə yeni asfalt örtüyü çəkilib. Bu prosesin ardıcıllığı təmin olunmaqla şəhərin digər yaşayış massivləri də növbəti mərhələlərdə əhatə olunacaq.

Şəhidlərin adını daşıyan küçələrin abadlaşdırılması həm mənəvi, həm də ictimai baxımdan xüsusi əhəmiyyət kəsb edir.

23-06-2025, 17:24 28