26 İyun – Silahlı Qüvvələr Gününə həsr olunmuş “Hədəf 12 – Gənclər Arasında Atıcılıq Turniri” 24 iyun 2025-ci il tarixində Bakı Atıcılıq Mərkəzində keçirilib.

Sumqayit.tv-in məlumatına görə turnir Azərbaycan Respublikasının Gənclər Fondu və “Böyük Qayıdış” Gənclər Təşkilatının dəstəyi ilə təşkil olunub.

Yarışda ümumilikdə 16 komanda iştirak edib. Sumqayıt şəhəri bu mötəbər yarışda iki komanda ilə – “Zəfər” və “Fatehlər” – təmsil olunub.

“Fatehlər” komandasının üzvü Azim Nuruyev yüksək dəqiqliklə atışlar edərək birinci yerin qalibi olub.
“Zəfər” komandası üzvü Həsən Yaqubov  isə uğurlu çıxışı ilə üçüncü yerin sahibi olub.

Yarışın sonunda qaliblərə kubok, medallar və dəyərli hədiyyələr təqdim olunub.

Tədbirin məqsədi gənclər arasında hərbi-vətənpərvərlik ruhunu gücləndirmək, atıcı bacarıqlarını inkişaf etdirmək və Silahlı Qüvvələr Gününü fərqli formatda qeyd etmək olub.

“Bizlər yalnız hədəfi vurmaqda iştirak etmədik, həm də öz bacarığımızı sübut etdik,” – deyə iştirakçılardan Həsən Yaqubov bildirib.

25-06-2025, 12:36 335