Sumqayıt şəhərində infrastrukturun yenilənməsi və vətəndaşların yaşayış şəraitinin yaxşılaşdırılması istiqamətində aparılan abadlıq işləri davam etdirilir.

Sumqayıt Şəhər İcra Hakimiyyəti başçısının tapşırıq və tövsiyələrinə əsasən, Stansiya Sumqayıt ərazisində genişmiqyaslı asfaltlama işləri həyata keçirilib. Layihə Sumqayıt Bələdiyyəsinin təşkilatçılığı ilə icra olunub.

Verilən məlumata görə, layihə çərçivəsində ümumilikdə 2000 kvadratmetrlik əraziyə yeni asfalt örtüyü döşənib. Asfaltlanma işləri əsasən məcburi köçkünlərin məskunlaşdığı şəhərcikdə, o cümlədən 12a saylı marşrut xəttinin son dayanacağı və onun ətraf küçələrində aparılıb.

İşlərin yerinə yetirilməsi zamanı əraziyə müasir texnika və canlı qüvvə cəlb olunub. Yenilənmiş yol infrastrukturu piyadaların və nəqliyyat vasitələrinin hərəkəti üçün daha təhlükəsiz və rahat şəraitin yaradılmasına xidmət edir.

Rəsmi qurumların məlumatına görə, bu cür layihələr şəhərsalma siyasətinin tərkib hissəsi kimi Sumqayıtda mərhələli şəkildə davam etdiriləcək.

28-06-2025, 12:55 43