Sumqayıtda təmir zamanı damdan yıxılan usta 20 gün sonra xəstəxanada dünyasını dəyişib.
Sumqayit.tv xəbər verir ki, hadisə 20 gün əvvəl Novxanı bağlarında yerləşən fərdi evlərin birində baş verib. 1981-ci il təvəllüdlü Vüsal Quliyev evin damında işləyərkən yıxılıb və ağır bədən xəsarətləri alıb. O, Sumqayıt Tibb Mərkəzinə yerləşdirilərək Reanimasiya şöbəsinə götürülüb. Pasiyentə lazımi tibbi müdaxilə və cərrahi əməliyyat göstərilsə də, həyatını xilas etmək mümkün olmayıb.

Meyit müvafiq ekspertiza üçün Məhkəmə Tibbi Ekspertiza və Patoloji Anatomiya Birliyinin Sumqayıt şöbəsinə təhvil verilib.

Faktla bağlı araşdırma aparılır.