Sumqayıt şəhərində yerli özünüidarəetmə institutlarının fəaliyyətinin gücləndirilməsi məqsədilə yeni təşəbbüs həyata keçirilib. Şəhərin müxtəlif ərazilərində fəaliyyət göstərən məhəllə komitələrinə yeni nümayəndələrin seçilməsi planlaşdırılır.
Bu məqsədlə Sumqayıt şəhər Ağsaqqallar Şurasının binasında Sumqayıt Bələdiyyəsinin təşəbbüsü ilə görüş təşkil olunub. Görüşdə bələdiyyə, ictimai təşkilatlar və veteran qurumlarının nümayəndələri iştirak ediblər.

Tədbirdə çıxış edən Sumqayıt şəhər Ağsaqqallar Şurasının sədri Təbrik Quliyev, məhəllə komitələrinin fəaliyyətində yaşlı nəslin təcrübəsindən istifadə edilməsinin vacibliyini qeyd edib. O bildirib ki, bu strukturlar yalnız idarəetmə deyil, həm də yerli ictimai münasibətlərin tənzimlənməsində rol oynaya bilər.

Müharibə, Əmək və Silahlı Qüvvələr Veteranları Təşkilatının Sumqayıt şöbəsinin sədri Sovet Şükürov çıxışı zamanı bələdiyyənin təşəbbüsünü dəstəklədiklərini bildirib və ictimai təşkilatlar tərəfindən də bu prosesə dəstəyin vacibliyini vurğulayıb.

Sumqayıt Bələdiyyəsinin sədri Adil Xudadatov isə yeni seçilən nümayəndələrin rolu və funksiyaları barədə məlumat verib. Onun sözlərinə görə, hazırda şəhərdə 154 məhəllə komitəsi fəaliyyət göstərir və bu komitələrdə orta hesabla 10-a yaxın üzv yer alır. Yeni nümayəndələr sakinlərin gündəlik problemləri, sosial ehtiyacları və infrastrukturla bağlı müraciətlərini bələdiyyəyə çatdırmaqda vasitəçi rolunu oynayacaqlar.

Görüşdə iştirak edən digər çıxışçılar da komitələrin fəaliyyəti, onların sakinlərlə əlaqələrinin gücləndirilməsi və kommunal məsələlərin həllinə töhfəsi ilə bağlı fikirlərini bölüşüblər. Müzakirələr zamanı məhəllələrdə yaşıllaşdırma, kommunal xidmətlər, yolların vəziyyəti, ekoloji məsələlər və digər gündəlik problemlər diqqət mərkəzində olub.

 
Bildirilib ki, bəzi hallarda mövcud problemlərin qeydiyyata alınsa da, həllində gecikmələr baş verir. Bu səbəbdən yeni nümayəndələrin operativ əlaqə qurmaq, bələdiyyəyə daimi geribildirim vermək imkanları ön plana çıxır.

Tədbirdə həmçinin, komitələrin fəaliyyətinin koordinasiyası, hesabatlılığın artırılması və vətəndaşla əlaqələrin rəqəmsal platformalar üzərindən genişləndirilməsi məsələləri də müzakirə olunub.

Sumqayıt Bələdiyyəsinin məlumatına görə, qarşıdakı aylarda məhəllə komitələrinin fəaliyyətinə dair yeni formatların tətbiqi, mütəmadi hesabatlılıq, ictimai dinləmələr və sakinlərlə müzakirə platformalarının yaradılması nəzərdə tutulur.