Sumqayit.tv-yə şəhər Bələdiyyısindın verilən məlumatda bildirir.

Sumqayıt Bələdiyyəsi vətəndaş yönümlü idarəetmə prinsipini əsas tutaraq növbəti dəfə şəhər sakinlərinə açıq tribuna təqdim edib.

"Unikal" xəbər verir ki, bələdiyyə sədri Adil Xudadatovun rəhbərliyi ilə vətəndaşların növbəti qəbul görüşü baş tutub. Görüşdə şəhərin müxtəlif ərazilərindən olan sakinlər iştirak edib və birbaşa olaraq öz problemlərini, təkliflərini və sosial ehtiyaclarını səsləndiriblər.

Qəbul zamanı çıxış edən vətəndaşlar əsasən şəhərdəki yol və küçələrin vəziyyəti, abadlıq işlərinin sürətləndirilməsi, aztəminatlı ailələrin sosial müdafiəsi, maddi yardım məsələləri, həmçinin məhəllələrdə yaşanan konkret infrastruktur problemləri ilə bağlı fikirlərini bölüşüblər.

Adil Xudadatov qaldırılan məsələləri diqqətlə dinləyib və həlli daha operativ şəkildə mümkün olan problemlərlə bağlı aidiyyəti şöbə və məsul şəxslərə yerindəcə tapşırıqlar verib. O, bildirib ki, Sumqayıt Bələdiyyəsi hər bir vətəndaşın səsini eşitmək və onların gündəlik həyatını asanlaşdırmaq üçün daim açıqdır:

 “Vətəndaş məmnuniyyəti bizim fəaliyyətimizin əsas ölçüsüdür. Hər bir sakin bizim üçün dəyərlidir və onların səsləndirdiyi hər fikir, hər təklif bizim üçün yön göstərən işıqdır,” – deyə bələdiyyə sədri vurğulayıb.

Qəbulda iştirak edən sakinlər Sumqayıt Bələdiyyəsinin yaratdığı şəffaf və hər kəs üçün açıq qəbul sistemindən məmnunluqla danışıblar. Onlar xüsusilə rəhbərliyin problemlərə şəxsi münasibəti və həssas yanaşmasını yüksək qiymətləndirib, bu imkana görə Adil Xudadatova təşəkkürlərini ifadə ediblər.

Qeyd olunub ki, Sumqayıt Bələdiyyəsi tərəfindən vətəndaş qəbulları mütəmadi olaraq təşkil ediləcək. Bu görüşlər vasitəsilə sakinlərə birbaşa müraciət imkanı yaradılır, həmçinin bələdiyyə vətəndaşların ehtiyaclarına daha yaxın və çevik reaksiya göstərmək imkanı əldə edir. Belə görüşlər şəhərdə ictimai fəallığın və qarşılıqlı etimadın artmasına mühüm töhfə verir.

Sumqayıt şəhər Bələdiyyəsi gələcəkdə də bu formatda görüşləri davam etdirmək, vətəndaşların rifahını, sosial təminatını və yaşayış mühitini yaxşılaşdırmaq üçün ardıcıl şəkildə tədbirlər görməyi qarşıya məqsəd qoyub.