503 nömrəli Sumqayıt–Saray marşrutu sentyabrın 15-dən etibarən yenidən fəaliyyətə başlayır.
Sumqayit.tv xəbər verir ki, Azərbaycan Yerüstü Nəqliyyat Agentliyindən (AYNA) verilən məlumata görə, keçirilən müsabiqənin nəticələrinə əsasən, xəttin istismarı “BakuBus” MMC-yə həvalə olunub. Marşrut yeni avtobuslarla təmin ediləcək və sərnişindaşıma yalnız nağdsız ödəniş sistemi əsasında aparılacaq.

Qeyd edək ki, Sumqayıt şəhəri ilə Abşeron rayonunun Saray qəsəbəsini birləşdirən bu marşrut uzun müddət fəaliyyətini dayandırmışdı. Marşrutun işləməməsi isə həm Sumqayıt, həm də Saray sakinlərinin ciddi narazılığına səbəb olmuşdu.

Yeni avtobusların xəttə buraxılması ilə sərnişinlərin gediş-gəlişinin daha rahat və təhlükəsiz olacağı gözlənilir. Xatırladaq ki, gedişhaqqı 0.70 qəpik olacaq.