Vətənimizin azadlığı və suverenliyi uğrunda canından keçmiş qəhrəmanlarımızın ailələrini ziyarət etdik, onların əziz xatirələrinə bir daha hörmət və ehtiramımızı bildirdik.

Əvvəlcə Vətən müharibəsində, 2020-ci ilin bu günü Tərtər-Ağdam istiqamətində gedən ağır döyüşlərdə şəhidlik zirvəsinə ucalmış Əhmədzadə Rüfət Əbülfət oğlunun ailəsini ziyarət etdik, onların qayğıları ilə maraqlandıq.

Rüfət ailənin tək oğlan övladı olub. Çox mərd, məğrur və qətiyyətli şəhid anamız Ruhiyyə xanımla övladı barədə həmsöhbət olduq. Şəhidimizin uşaqlıq, məktəb illərindən, hərbi xidmət müddətindəki xatirələrini birlikdə yada saldıq, onun çəkdiyi şəkillərə baxdıq. Hər xatirə, hər an Rüfətin nə qədər istedadlı, mərd və vətənpərvər, həyat eşqi ilə yaşayan bir gənc olduğunu göstərirdi. Ruhiyyə xanım söhbətimiz zamanı həm kədərini, həm də qürurunu bizimlə bölüşdü. Dedi ki, oğlunun yoxluğu hər gün qəlbini sızladır, amma onun qəhrəmanlığı, Vətən uğrunda göstərdiyi şücaət onu qürurlandırır.

Daha sonra 28 sentyabr 2020-ci ildə Murovdağ istiqamətində gedən döyüşlərdə qəhrəmancasına şəhid olmuş Rəşidov İlham Tahir oğlunun ailəsini ziyarət etdik. İlham bəyin ömür-gün yoldaşı Samirə xanımla səmimi söhbətimiz oldu. O, həm bir şəhid xanımı, həm də iki övladını atasız böyüdən qəhrəman anadır. Şəhidimizin bir qız və bir oğlan övladı bizə əmanətdir. Onlar hazırda məktəblidirlər.

Görüşlərimiz zamanı Prezident İlham Əliyev və Birinci vitse-prezident Mehriban xanım Əliyevanın şəhid ailələrinə, qazilərə, müharibə veteranlarına diqqət və qayğısından bəhs etdim.

Şəhidlik Vətən, torpaq, böyük amallar uğrunda candan keçmək, özünü bu yolda qurban verərək ömür payını gələcək nəsillərin xoşbəxtliyinə bağışlamaqdır. Əbəs yerə demirlər ki, hər kəsə bu zirvə nəsib olmur. Şəhidlik həm də bir məktəbdir. Elə bir məktəb ki, biz o məktəbdən igidliyi, mərdliyi, cəsurluğu, Vətən uğrunda candan keçməyin nə olduğunu öyrənirik.

Hər dəfə şəhidlərimizin ailələri ilə görüşəndə, onlarla söhbətləşəndə heyrətə gəlirəm. Şəhidlərimiz bir-birinə o qədər oxşayırlar ki, elə bilirsən ki, amalları, igidlikləri kimi zövqləri, həyat tərzləri, yarım qalan arzuları da eyni imiş… Elə bil Allah onları uca zirvə üçün yaradıbmış…

İllər ötüb, qərinələr dolaşsa da, şəhidlərimiz heç vaxt unudulmayacaq, onların əziz xatirəsi həmişə minnətdarlıq duyğuları ilə yada salınacaq.

Allah bütün şəhidlərimizə rəhmət eləsin!