AFFA Hakimlər Komitəsinin sədri Frank De Bleker Azərbaycan Premyer Liqasının VI turunda keçirilən “Sabah” – “Sumqayıt” oyunundakı mübahisəli epizodlarla bağlı açıqlama verib.

Sumqayit.tv xəbər verir ki, komitə sədrinin sözlərinə görə:

16-cı dəqiqə – “Sabah”ın futbolçusu (№11) “Sumqayıt”ın oyunçusuna (№80) qarşı ehtiyatsız şəkildə qayda pozdu. Hakim epizodu gördü, üstünlük tətbiq etdi və top oyundan çıxdıqdan sonra “Sabah”ın futbolçusuna sarı vərəqə göstərdi. Bu qərar doğru hesab olunur.

45+2-ci dəqiqə – “Sabah”ın futbolçusunun (№21) zərbəsi “Sumqayıt”ın müdafiəçisinin qoluna dəyib. Müdafiəçinin qolu bədənə yaxın vəziyyətdə olduğu üçün penalti təyin edilmədi. Hakimin qərarı və VAR-ın müdaxiləsizliyi düzgün sayılıb.

78-ci dəqiqə – “Sabah” qol vurdu, lakin hücumun əvvəlində “Sabah”ın oyunçusu (№5) “Sumqayıt”ın oyunçusuna (№21) qarşı ehtiyatsız oynamışdı. VAR epizoda baxılmasını tövsiyə etdi. Hakim qolu ləğv etdi, “Sumqayıt”ın xeyrinə cərimə zərbəsi təyin etdi və “Sabah”ın futbolçusuna sarı vərəqə göstərdi.

90+2-ci dəqiqə – “Sabah”ın hücumçusu (№20) qol vursa da, epizod zamanı topa əllə toxunduğu üçün qol VAR tərəfindən ləğv edilib.

Frank De Bleker bütün qərarların qaydalara uyğun olduğunu bildirib.