Sumqayıt şəhərində qanunsuz küçə ticarətinin qarşısının alınması məqsədilə keçirilən növbəti reyd ictimai marağa səbəb olub. Şəhərin 20 Yanvar küçəsi, keçmiş Nizami meydanında təşkil olunan tədbir zamanı 11 ədəd qanunsuz köşk sökülərək ərazidən götürülüb. Aidiyyəti qurumların iştirakı ilə aparılan reyd zamanı köşklər xüsusi texnika vasitəsilə daşınıb və bildirilib ki, bu cür tədbirlər bundan sonra da davam etdiriləcək.
Reydlə bağlı diqqətçəkən məqamlardan biri isə eyni ərazidə yerləşən "Markova” adlı ikimərtəbəli obyektin sökülməməsi olub. Xeberle.com-un məlumatına görə, digər köşklər qanunsuz hesab edilərək dərhal ərazidən çıxarıldığı halda, sözügedən obyektin yerində qalması bəzi suallar doğurub. Bununla bağlı redaksiyamıza vətəndaşlardan müraciətlər daxil olub.
Əgər məqsəd qanunsuz küçə ticarətinin qarşısını almaqdırsa, bu zaman bütün obyektlərə eyni hüquqi meyarların tətbiqi ictimai baxımdan daha anlaşılan və qəbulolunan olar.
Belə hallarda rəsmi açıqlamanın verilməsi vacibdir. Çünki "Markova” obyektinin hansı hüquqi əsasla toxunulmaz qaldığı barədə məlumatın ictimaiyyətlə paylaşılmaması müxtəlif ehtimalların yaranmasına səbəb olur. Halbuki, şəffaf mövqe bu cür sualların qarşısını ala və görülən işlərə inamı artıra bilər.
Qanunsuz küçə ticarətinə qarşı mübarizə ardıcıl və prinsipial şəkildə aparıldıqda həm şəhərsalma qaydalarına əməl olunur, həm də bərabərlik prinsipi qorunur. Vahid yanaşma olmadığı halda, ictimaiyyətdə müəyyən narahatlıqların yaranması qaçılmazdır. Çünki əgər obyekt qanunidirsə, bunun rəsmi şəkildə bildirilməsi, əks halda isə digər köşklərlə eyni qaydada tədbir görülməsi məqsədəuyğun olardı. Qanunun hər kəs üçün eyni şəkildə tətbiqi həm hüquqi dövlət prinsiplərinə, həm də ictimai ədalət anlayışına xidmət edir.
/Xeberle.com
6-01-2026, 14:34
167
