İyulun 11-də Sumqayıt Dövlət Universitetində (SDU) Elmi Şuranın cari tədris ilinin son iclası keçirilib. İclas 2024/2025-ci tədris ilinin yaz semestrinin imtahan sessiyasının yekunlarına və qarşıda duran əsas vəzifələrə həsr olunub. İclası Elmi Şuranın sədri, universitetin rektoru v.i.e., AMEA-nın müxbir üzvü, professor Əminağa Sadıqov açaraq, şura üzvlərini salamlayıb və gündəlikdə duran məsələləri iştirakçıların diqqətinə çatdırıb. O, universitetin ötən tədris ilində əldə etdiyi nailiyyətləri təhlil edərək, bu uğurların davamlı inkişafını təmin etmək məqsədilə kollektiv şəkildə atılacaq addımların zəruriliyini vurğulayıb. Professor Əminağa Sadıqov SDU-nun ilk dəfə nüfuzlu “QS 2026 Dünya Universitetləri Reytinqi” siyahısında yer almasını tarixi uğur kimi dəyərləndirib. O, bildirib ki, bu göstərici universitetin beynəlxalq arenada tanınmasının bariz nümunəsidir və yeni tədris ilində də bu istiqamətdə işlər daha da intensiv şəkildə davam etdiriləcək. Sonra iclasın gündəliyinə uyğun olaraq çıxışlar dinlənilib. 2024/2025-ci tədris ilinin yaz semestrinin imtahan sessiyasının yekunları barədə bakalavriat, magistratura səviyyələri üzrə Elm və innovasiyalar üzrə prorektor, dosent Elşad Abdullayev, SDU-nun nəzdində Sumqayıt Dövlət Texniki Kolleci üzrə imtahan sessiyasının nəticələri barədə SDTK-nın direktoru dosent Mətanət Pirquliyeva geniş təqdimatla çıxış ediblər. Onlar qiymətləndirmə meyarları, imtahan prosesinin yekunları və gələcəkdə təhsilin keyfiyyətinin artırılması istiqamətində görüləcək işlər barədə məlumat veriblər. SDU-da baş müəllim vəzifəsinə keçid üçün tələblər və prosedur barədə Tədris Metodiki Mərkəzin direktoru dosent Osman Hacıyev məruzə edərək universitetin akademik göstəricilər baxımından ardıcıl inkişaf etdiyini qeyd edib. O, həmçinin baş müəllim vəzifəsinə keçid üçün tələb olunan şərtlər və qəbul proseduru barədə məlumat verib. Sonra baş müəllim vəzifəsinə keçidlə bağlı tələblər və prosedur qaydaları Elmi Şura tərəfindən müzakirə olunaraq təsdiq edilib. Elmi Şuranın qərarlarının yerinə yetirilməsi haqqında Elmi katib, professor Muxtar Səmədov çıxış edərək Elmi Şura tərəfindən qəbul edilmiş qərarların icrası vəziyyəti ilə bağlı çıxış edib. Qeyd edib ki, Elmi Şuranın qərarları struktur rəhbərləri tərəfindən daim diqqət mərkəzində saxlanılır və vaxtında yerinə yetirilir. Bəzi məsələlər davamlı xarakter daşıyır və zərurət yarandıqda yenidən baxılması həyata keçirilir. Daha sonra Rektorun müşaviri Əhməd Əhmədzadə çıxış edərək qeyd edib ki, Mühəndislik fakültəsinin kibertəhlükəsizlik üzrə SABAH qrupunun magistrantı Mətanət Əhmədovanın məqaləsi Avstraliyanın Sidney şəhərində keçiriləcək konqresin elmi proqramına daxil olub. Bununla əlaqədar olaraq, onun konqresdə əyani iştirak etməsinə dair qərar qəbul olunub.

Elmi Şurada magistrant Mətanət Əhmədovanın konqresdə iştirak etməsi qərara alınıb. Cari məsələlər müzakirəsində Tədris vəsaitlərinə nəşr hüququ (qrif) verilməsi barədə professor Muxtar Səmədov məlumat verib. Bildirib ki, Elmi Şuraya 7 tədris vəsaiti daxil olub. Onlardan 2-si dərs vəsaiti, 1 monaqrafiya və 4-ü fənn proqramıdır. Aparılan müzakirələrdən sonra müvafiq qərarlar qəbul edilib. Bununla da, Elmi Şuranın 2024/2025-ci tədris ilinə həsr olunmuş yekun iclası uğurla başa çatıb.