Ucqar kəndlərdə yaşayan uşaqların və gənclərin təhsil imkanlarını genişləndirmək məqsədilə yeni sosial təşəbbüs – “Kitab Toplama Aksiyası” başladı. Aksiya maddi imkansızlıq səbəbindən kitaba və tədris vəsaitlərinə çıxışı məhdud olan uşaqlara dəstək olmaq, onları motivasiya etmək və yeni bilik imkanları yaratmağı hədəfləyir.

Təşəbbüs çərçivəsində uşaq nağılları, hekayələr, klassik və müasir ədəbiyyat nümunələri, həmçinin son illərin test vəsaitləri, elmi-populyar kitablar toplanır. Bununla yanaşı, dəftər, qələm, xətkeş, rəngli karandaş, məktəb çantası kimi müxtəlif təhsil ləvazimatları da ianə edilə bilər.

Toplanan materiallar kənd məktəblərinə və az təminatlı ailələrin övladlarına çatdırılacaq.

Toplanma məkanları:

• Sumqayıt: Sumqayıt Gənclər Evi (Resepşn)

• Bakı: Emalatxana Art Space & Cafe

Aksiya haqqında daha çox məlumatı təşkilatçıların sosial media hesabından əldə etmək mümkündür.