Sumqayıt şəhərində fəaliyyət göstərən iki internat tipli gimnaziyada uşaqların yaşayış və təhsil şəraiti ilə bağlı bir sıra nöqsanlar müəyyən edilib.
Sumqayit.tv xəbər verir ki, bu barədə **Azərbaycan Respublikasının İnsan Hüquqları üzrə Müvəkkili (Ombudsman)**nin Aparatı məlumat yayıb.
Bildirilib ki, Ombudsmanın Milli Preventiv Qrupu Sumqayıt şəhər internat tipli gimnaziyada və general M.Əsədov adına inteqrasiya təlimli internat tipli gimnaziyada monitorinqlər aparıb. Araşdırmalar zamanı uşaqlarla rəftar, onların hüquqlarının təmin olunması, yaşayış və tədris şəraitinin vəziyyəti öyrənilib.
Monitorinqlər nəticəsində Sumqayıt şəhər internat tipli gimnaziyada yataqxana korpusunun yalnız məhdud hissəsinin şagirdlərin istifadəsinə verildiyi, bu səbəbdən yaşayış şəraitinin tam təmin olunmadığı müəyyən edilib. Həmçinin hamam otaqlarının istifadəyə yararsız vəziyyətdə olduğu, sanitar qovşaqların çatışmadığı və gigiyena normaları ilə bağlı problemlərin mövcud olduğu qeyd olunub.
General M.Əsədov adına inteqrasiya təlimli internat tipli gimnaziyada isə xüsusi qayğıya ehtiyacı olan uşaqlar üçün effektiv inklüziv təhsil mexanizmlərinin yaradılmadığı bildirilib. Bu hal inklüziv təhsil hüququnun tam təmin olunmasına maneə yaradır.
Eyni zamanda, hər iki müəssisədə uşaqların geyim və ayaqqabı təminatının mövcud normalara tam uyğun həyata keçirilmədiyi, bəzi hallarda gecikmələrin və çatışmazlıqların olduğu aşkar edilib.
Aşkar edilmiş nöqsanlarla bağlı müəssisə rəhbərliklərinə müvafiq tövsiyələr verilib. Qeyd olunub ki, monitorinqlərin nəticələri barədə Elm və Təhsil Nazirliyinə müraciət ediləcək və tövsiyələrin icrası nəzarətdə saxlanılacaq. // "Report"