Son illər Azərbaycanda ali təhsil müəssisələrində təhsil haqlarında artım müşahidə olunur və bu məsələ abituriyentlər və valideynlər arasında geniş müzakirə olunur.

Mövzu ilə bağlı Modern.az-a açıqlama verən Milli Məclisin deputatı, Odlar Yurdu Universiteti-nin İdarəetmə Şurasının sədri Samir Vəliyev bildirib ki, artımın əsas səbəblərindən biri müəllim və universitet əməkdaşlarının maaş tələblərinin yüksəlməsidir.

Onun sözlərinə görə, yaşayış səviyyəsinin artması ali məktəblərin xərclərinə birbaşa təsir edir və universitetlər keyfiyyətli kadrları cəlb etmək üçün daha yüksək əməkhaqqı təklif etməyə məcbur qalırlar.

Deputat qeyd edib ki, tələbə və valideynlərin daha keyfiyyətli təhsil gözləntiləri də xərcləri artırır. Müasir infrastrukturun qurulması, yeni binaların və laboratoriyaların tikilməsi, xüsusilə texnoloji ixtisaslar üzrə bahalı avadanlıqların alınması ciddi maliyyə tələb edir.

Onun fikrincə, xarici universitetlərlə əməkdaşlıq, ikili diplom proqramları və rəqəmsallaşma da əlavə xərclər yaradan əsas amillər sırasındadır.

Təhsil eksperti Ramin Nurəliyev isə bildirib ki, dövlət universitetlərində təhsil haqları Nazirlər Kabineti və Elm və Təhsil Nazirliyi ilə razılaşdırılaraq müəyyən olunur. Özəl universitetlərdə isə qiymətlər ali məktəbin rəhbərliyi tərəfindən formalaşdırılır.

Ekspert vurğulayıb ki, universitetin nüfuzu, tədris keyfiyyəti, maddi-texniki bazası və rəqabət qabiliyyəti təhsil haqqına ciddi təsir edir. Bu səbəbdən ADA Universiteti, Bakı Ali Neft Məktəbi, Azərbaycan Dövlət İqtisad Universiteti və Xəzər Universiteti kimi ali məktəblərdə təhsil haqları daha yüksəkdir.

O, əlavə edib ki, eyni universitet daxilində belə ixtisasdan asılı olaraq qiymətlər dəyişir və daha çox tələb olan sahələrdə təhsil haqqı daha yüksək olur.

Dünən, 12:37 12