Abşeron, Bakı, Gəncə, Sumqayıt və Naxçıvan şəhərlərində yerləşən prioritet məktəblərdə boş qalan yerlərə qəbul prosesinə start verilib.

Sumqayıt TV xəbər verir ki, ölkənin ümumi təhsil müəssisələrinin birinci siniflərinə elektron şagird qəbulu prosesində növbəti mühüm mərhələyə start verilib. Məktəbəqədər və Ümumi Təhsil üzrə Dövlət Agentliyindən daxil olan məlumata əsasən, bu gün saat 11:00-dan etibarən qəbul sistemində üstünlük hüququ tətbiq edilən məktəblərdə boş qalan yerlərə sərbəst qeydiyyat aktivləşdirilib.

Yeni tənzimləmə xüsusilə Bakı, Sumqayıt, Gəncə, Naxçıvan şəhərlərini və Abşeron rayonunu əhatə edir. Qeyd olunan ərazilərdə yerləşən prioritet təhsil müəssisələrindəki vakant yerlərə artıq prioritetsiz, yəni hər bir şagird üçün sərbəst qəbul qaydaları tətbiq olunur.

Bu mərhələnin ən diqqətçəkən məqamlarından biri də odur ki, artıq Azərbaycan bölməsi üzrə həm məktəb, həm də müəllim seçimində əvvəlki üstünlük hüquqları qüvvədən düşüb və proses zamanı bu imtiyazlar nəzərə alınmayacaq. Validəynlər boş qalan yerlər üzrə övladlarının qeydiyyatını birbaşa sərbəst şəkildə apara bilərlər.

Prosesin şəffaflığını təmin etmək məqsədilə, üstünlük hüququ tətbiq edilən ümumi təhsil müəssisələrinin tam və dəqiq siyahısı öncədən ictimaiyyətə təqdim olunub. Vətəndaşlar bu siyahı və digər texniki detallarla rəsmi mektebeqebul.edu.az portalı vasitəsilə tanış olaraq qeydiyyat prosesini tamamlaya bilərlər.

Sumqayıt TV

Bu gün, 12:08 9