Sumqayıt Mənzil-Kommunal Təsərrüfat Birliyinin rəhbər müavini, təcrübəli mühəndis və ictimai xadim Səməd Əhmədov 60 yaşını qeyd edir.

Onun şəhərin abadlığı və infrastruktur inkişafına verdiyi töhfələr xüsusi dəyərləndirilir.

Bu günlərdə Sumqayıt şəhərinin ictimai və xidmət sahəsində mühüm rolu olan, peşəkar mühəndis və nümunəvi şəxsiyyət Əhmədov Səməd Məmməd oğlunun doğum günüdür.

Səməd Məmməd oğlu Əhmədov 1965-ci il noyabrın 1-də Qərbi Azərbaycanın Amasiya rayonunun Daşkörpü kəndində dünyaya gəlmişdir. Uşaqlıq illərindən çalışqanlığı, məsuliyyət hissi və təvazökarlığı ilə seçilən Səməd bəy orta təhsilini doğma kəndində başa vurduqdan sonra Bakı İnşaat Mühəndisləri İnstitutunun Yol İnşaatı fakültəsinə qəbul olunmuş, 1990-cı ildə mühəndis ixtisası üzrə təhsilini başa çatdırmışdır.

Peşəkar fəaliyyətinə 1990-cı ildən başlayaraq, uzun illər “Azəravtoyol” Dövlət Şirkətində məsul vəzifələrdə çalışmış, yol inşaatı və kommunal xidmət sahəsində böyük bilik və təcrübə qazanmışdır.
2001-ci ildən etibarən Sumqayıt Şəhər Mənzil-Kommunal Təsərrüfat Birliyində baş mühəndis, 2015-ci ildən isə rəhbər müavini vəzifəsində fəaliyyət göstərir.

Səməd Əhmədov bu illər ərzində Sumqayıtın abadlığı, infrastrukturun yenilənməsi və kommunal xidmətlərin təkmilləşdirilməsi istiqamətində mühüm layihələrin həyata keçirilməsində yaxından iştirak edib. Onun peşəkarlığı, idarəçilik bacarığı və əməksevərliyi həmkarları və şəhər ictimaiyyəti arasında yüksək dəyərləndirilir.
Göstərdiyi xidmətlərə görə o, 2004-cü ildə “Tərəqqi” medalı ilə təltif olunmuşdur.

Bu günlərdə Səməd Məmməd oğlu 60 illik ömür yubileyini qeyd edir. Bu yaş yalnız zamanın göstəricisi deyil — həm də ömür boyu toplanan təcrübənin, dürüst əməyin və qazandığı hörmətin rəmzidir. 60 il – həyatın dolğun mərhələsi, insanın həm peşəkar, həm də mənəvi baxımdan zirvəyə çatdığı dövrdür.

Səməd bəy bu mərhələyə zəngin həyat yolu, Vətənə və işinə sədaqəti, ailə dəyərlərinə sadiqliyi ilə çatmışdır. Onun fəaliyyəti Sumqayıtın inkişafına, şəhərin gözəlləşməsinə və insanların rifahına yönəlmişdir.

Bu münasibətlə Sumqayit.tv ailəsi olaraq biz də Səməd Məmməd oğlu Əhmədovu 60 illik yubileyi münasibətilə ürəkdən təbrik edir, ona möhkəm can sağlığı, ailə səadəti və gələcək fəaliyyətində yeni uğurlar arzulayırıq.

Doğum gününüz mübarək, Səməd müəllim!
Sizin kimi peşəkar və vətənpərvər insanların fəaliyyəti Sumqayıtın sabahını daha da parlaq edir.

Dünən, 12:19 62