Bildiyiniz kimi dünən Bakı Dəmir Yolu Vağzalında Sumqayıt-Xırdalan-Bakı qatarının sərnişinləri qatarların gecikməsi səbəbindən sıxlığın yaşanmasından stansiya rəhbərliyinə etiraz ediblər.
Qeyd edək ki, bir müddət öncə 07:45 intervalı ilə hərəkət edən Sumqayıt-Xırdalan-Bakı qatarının ləğv edilməsi bu istiqamətdə sıxlığın daha da artmasına səbəb olub.Hətta dünən səhər saatlarında sıxlığın yaranması və qatardakı kondisionerlərin işləməməsindən sərnişinlərdən birinin halı pisləşib.
Etiraz edənlər bu elektrik qatarı ilə gündəlik işə gedib-gəlmək xeyli çətinləşdiyini bildiriblər.
Qatarların sayının azlığından şikayət edən vətəndaşlar problemin tezliklə həll olunmasını tələb ediblər.
“Azərbaycan Dəmir Yolları” QSC “Sumqayıt-Xırdalan-Bakı istiqamətində yaranmış sərnişin sıxlığının aradan qaldırılması məqsədilə qatarların hərəkət qrafikində hissəvi dəyişiklik ediləcəyini bəyan edib.
Ümumiyyətlə Sumqayıt- Bakı marşrutu üzrə hərəkət edən sürət qatarı ilə bağlı problemlər mütəmadi olaraq yaşanır və mətbuatda tez-tez işıqlanır.Mövcud problemin – adıçəkilən sürət qatarında sıxlığın yaranmasının səbəblərindən biri də yeni tədris ilinin başlamasıdır. Beləki, Sumqayıtda yaşayan tələbələrin oxuduqları ali təhsil müəssisələrinə getmək üçün istifafə etdiyi əsas nəqliyyət vasitəsindən biri də Bakı-Sumqayıt sürət qatarıdır.Təhsil ilinin başlaması ilə Bakı-Sumqayıt sürət qatarına sərnişin axınının artması qatarda sıxlığın pik həddə çatmasına gətirib çıxarır.
Bu sıxlığın aradan qaldırılması üçün çıxış yollarından biri kimi , hər gün Sumqayıtdan Bakıya gedən tələbələrin çoxluğunu nəzərə alıb xüsusi olaraq tələbələr üçün əlavə Sumqayıt-Bakı marşrutunu xəttə buraxmaq olar. Belə olacağı təqdirdə yaşanan sərnişin sıxlığının qarşısını xeyli almaq mümkün olar.

Müəllif: Nihat Kərimli