Son günlər Sumqayıt da daxil olmaqla Azərbaycanın müxtəlif bölgələrində müşahidə olunan çəyirtkələrin mənşəyi ilə bağlı araşdırmaların nəticəsi açıqlanıb.

Sumqayit.tv Azərbaycan Qida Təhlükəsizliyi Agentliyinə (AQTA) istinadən xəbər verir ki, ölkənin müxtəlif ərazilərində yerləşən 95 məntəqədə aparılan monitorinqlər və laborator analizləri nəticəsində invaziv növlərə aid çəyirtkələrin Qazaxıstan və Rusiya ərazilərindən miqrasiya etdiyi ehtimal olunur.

Məlumata görə, ölkə ərazisində karantin tətbiq edilməyən invaziv növlərdən Şərq qozbel çəyirtkəsi, kiçik xaçlı çəyirtkə və barbar çəyirtkəsi qeydə alınıb. Mütəxəssislər bildirirlər ki, bu növlər Azərbaycan faunası üçün xarakterik deyil.

AQTA qeyd edib ki, fitosanitar təhlükəsizliyin təmin olunması məqsədilə Kənd Təsərrüfatı Nazirliyi və Ekologiya və Təbii Sərvətlər Nazirliyi ilə birgə monitorinqlər və zərərvericilərə qarşı mübarizə tədbirləri davam etdirilir.

Qurumdan bildirilib ki, çəyirtkələrin populyasiya sıxlığının nəzarətdə saxlanılması, kənd təsərrüfatına dəyə biləcək ziyanın minimuma endirilməsi və digər ərazilərə yayılmasının qarşısının alınması istiqamətində zəruri tədbirlər görülür.

9-07-2026, 14:50 75