Sumqayıt şəhərində yerləşən 57 nömrəli körpələr evi–uşaq bağçasında mərmiyə bənzər əşyaların aşkarlanması ilə bağlı araşdırma aparılır.

Sumqayit.tv xəbər verir ki, hadisə bağçanın yardımçı otaqlarından birinə baxış keçirilən zaman qeydə alınıb. Baxış zamanı mərmiyə bənzər 2 ədəd naməlum əşya aşkarlanıb.

Məlumata görə, hadisə barədə dərhal hüquq-mühafizə orqanlarına məlumat verilib. Ərazi nəzarətə götürülüb, təhlükəsizlik tədbirləri gücləndirilib və müəssisədə zəruri təxliyə işləri həyata keçirilib.

Bildirilib ki, hazırda vəziyyət tam nəzarət altındadır və uşaqların təhlükəsizliyi təmin olunub.

İlkin ehtimallara əsasən, aşkar olunan əşyaların əvvəlki dövrlərə aid köhnə materiallar arasında qalması istisna edilmir.

Faktla bağlı aidiyyəti qurumlar tərəfindən araşdırma aparılır.

Mənbə: “Azərbaycan müəllimi” qəzeti.

12-05-2026, 11:57 216