Sumqayıt Dövlət Universitetində Ümumdünya Şəhərsalma Forumunun 13-cü sessiyası (WUF13) ilə bağlı müəllim və tələbələrin iştirakı ilə xüsusi sessiya təşkil olunub.

Tədbirdə çıxış edən Sumqayıt Şəhər İcra Hakimiyyətinin sektor müdiri Fərman Kazımov şəhərin yaranma tarixi və inkişaf mərhələləri barədə məlumat verib. O, son illərdə Sumqayıtda həyata keçirilən şəhərsalma layihələrindən danışaraq WUF13 forumunun beynəlxalq əhəmiyyət daşıdığını bildirib.

Dövlət Şəhərsalma və Arxitektura Komitəsinin nümayəndəsi Ramiz İdrisoğlu isə işğaldan azad olunan ərazilərdə aparılan quruculuq işlərinə diqqət çəkib. Bildirilib ki, Qarabağ və Şərqi Zəngəzurda müasir şəhərsalma prinsiplərinə uyğun yaşayış məkanları yaradılır.

WUF13 Azərbaycan Əməliyyat Şirkətinin kommunikasiya üzrə meneceri Emin Hüseynzadə forumun proqramı barədə məlumat verərək tələbə və müəllimləri tədbirdə iştirak etməyə dəvət edib. O qeyd edib ki, forumda həm əyani, həm də onlayn iştirak mümkündür.

Qeyd edək ki, tədbirin davamı olaraq Göyərçin parkında ictimai proqram təşkil olunub. Festival çərçivəsində şəhər inkişafı, innovativ həllər və dayanıqlı mühit mövzularında müxtəlif təqdimatlar və interaktiv fəaliyyətlər keçirilib.

12-05-2026, 20:53 224