Sumqayıt Dövlət Dram Teatrında rus dramaturqu Lev Ustinovun “Xilaskar qurbağa” əsəri əsasında hazırlanan eyniadlı uşaq tamaşasının məşqlərinə start verilib.

Sumqayit.tv xəbər verir ki, teatrın təqdim etdiyi yeni səhnə əsəri dostluq, cəsarət və mərhəmət kimi dəyərləri ön plana çıxaran alleqorik nağıl motivləri üzərində qurulub.

Tamaşada hadisələr ağıllı Qurbağa ilə qorxaq Dovşanın dostluğu ətrafında inkişaf edir. Meşədə baş verən hadisələr zamanı Qurbağa müxtəlif təhlükələrlə üzləşən dostunu qorumağa çalışır. Süjet xəttində meşə hökmdarı Şirin heyvanlardan qurban tələb etməsi və Tülkünün hiyləgər planları hadisələrin gərginliyini artırır. Sonda isə Qurbağa öz ağlı və cəsarəti sayəsində dostunu xilas edərək ədalətin bərpasına nail olur.

Teatrdan bildirilib ki, tamaşanın əsas ideyası birlik, dostluq və ağlın fiziki gücdən üstün olması mesajını tamaşaçılara çatdırmaqdır.

Yeni səhnə əsərinin quruluşçu rejissoru Fuad Kazımov, rejissoru Ləman Məmmədli, quruluşçu rəssamı Osman Kazımov, musiqi tərtibatçısı Telman Qəniyev, rəqslərin quruluşu Kamil Ağazadə, rejissor köməkçisi isə Fazilə Rzayevadır.

Tamaşada Əməkdar artist Elmira Kərimova ilə yanaşı aktyorlar Emil Həmidov, Məryəm Hüseynli, Sevda Cəlilova, Aynur Hümmətova, İlham Səfərli, Əjdər Zeynalov, Mətanət Əmirullayeva, Habil Xanlarov, Şəms Abdullayeva və Günəş Bağırova rol alırlar.

Bu gün, 11:15 13