Çin Xalq Respublikasının Çunçin şəhərində 19–22 may 2026-cı il tarixlərində keçirilən beynəlxalq qardaş şəhərlər əməkdaşlıq konfransında Sumqayıt şəhərinin nümayəndə heyəti iştirak edib.
Sumqayit.tv xəbər verir ki, tədbirdə Sumqayıt Şəhər İcra Hakimiyyətinin rəsmisi Gündüz Əliyevin rəhbərlik etdiyi nümayəndə heyəti təmsil olunub.
Konfrans çərçivəsində şəhər idarəçiliyi, yaşıl inkişaf, sənaye əməkdaşlığı, iqtisadi innovasiyalar, logistika və beynəlxalq tərəfdaşlıq istiqamətində müzakirələr aparılıb. Tədbirdə dünyanın müxtəlif ölkələrindən nümayəndə heyətləri iştirak edib.
Müzakirələr zamanı Çunçin şəhərinin beynəlxalq logistika və sənaye mərkəzi kimi artan rolu xüsusi vurğulanıb.
Tədbir çərçivəsində iqtisadi-ticarət görüşləri, sərgilər, mədəniyyət və turizm təqdimatları, eləcə də sənaye müəssisələrinə baxış təşkil olunub. Sumqayıt nümayəndə heyəti müxtəlif şirkət və iş adamları ilə əməkdaşlıq imkanlarını müzakirə edib.
Konfransda çıxış edən nümayəndə heyəti tərəfindən Prezident İlham Əliyevin rəhbərliyi ilə Sumqayıtda həyata keçirilən sənayeləşmə siyasəti, şəhərdə yaradılan müasir sənaye infrastrukturu və xüsusilə Sumqayıt Kimya Sənaye Parkı barədə ətraflı məlumat verilib.
Bununla yanaşı, şəhərdə ekoloji tarazlığın qorunması, ətraf mühitin mühafizəsi, yaşıllaşdırma və davamlı inkişaf istiqamətində görülən işlər iştirakçıların diqqətinə çatdırılıb.
Qeyd olunub ki, beynəlxalq qardaş şəhərlər platforması çərçivəsində keçirilən bu cür tədbirlər şəhərlər arasında iqtisadi, humanitar və mədəni əlaqələrin genişlənməsinə, qarşılıqlı təcrübə mübadiləsinin güclənməsinə mühüm töhfə verir.
26-05-2026, 15:53
148
