Qabaqcadan əlbir olan bir qrup şəxs tərəfindən iki və daha çox şəxsi qanunsuz azadlıqdan məhrum etməkdə təqsirləndirilən "Qurtuluş" Reabilitasiya Mərkəzinin rəhbəri Ceyhun Salmanov və mərkəzin əməkdaşları Elşad Məhərrəmov ilə Natiq Əliyevin cinayət işi üzrə məhkəmə prosesi başa çatıb.

Sumqayit.tv xəbər verir ki, Sumqayıt Şəhər Məhkəməsində hakim Fərid Nəsimiyevin sədrliyi ilə keçirilən iclasda hökm elan olunub.

Məhkəmənin hökmünə əsasən, Ceyhun Salmanov 3 il 3 ay, Elşad Məhərrəmov 3 il 6 ay, Natiq Əliyev isə 3 il müddətinə azadlıqdan məhrum edilib.

Eyni zamanda, onlara Azərbaycan Respublikasının Cinayət Məcəlləsinin 70-ci maddəsi tətbiq olunaraq 2 il sınaq müddəti müəyyən edilib və hər üç şəxs məhkəmə zalından azadlığa buraxılıb.

Qeyd edək ki, istintaq zamanı mərkəzdə 7-dən çox şəxsin zor tətbiq edilməklə və aldatma yolu ilə müəssisəyə gətirildiyi, iradələrinə zidd olaraq qanunsuz saxlanıldığı, yaxınları ilə əlaqə saxlamaq imkanından məhrum edildiyi, həmçinin onlara fiziki və psixi iztirab verildiyi müəyyən edilib.

Toplanmış sübutlar əsasında təqsirləndirilən şəxslərə Azərbaycan Respublikasının Cinayət Məcəlləsinin 145.2.1 və 145.2.4-cü maddələri (qabaqcadan əlbir olan bir qrup şəxs tərəfindən iki və daha çox şəxsi qanunsuz azadlıqdan məhrum etmə) ilə ittiham irəli sürülmüşdü.//Oxu.az

1-07-2026, 13:18 119