Fövqəladə Hallar Nazirliyinin Dövlət Yanğından Mühafizə Xidməti Sumqayıtda növbəti yanğın-taktiki təlim təşkil edib.
Sumqayit.tv xəbər verir ki, təlim şəhərin 18-ci mikrorayonunda yerləşən “Qərb” şadlıq sarayında keçirilib.
Təlimin əsas məqsədi obyekt əməkdaşlarına yanğın və digər fövqəladə hallar zamanı davranış qaydalarını öyrətmək, həmçinin bu tip obyektlərdə baş verə biləcək yanğınlara operativ müdaxilə bacarıqlarını təkmilləşdirmək olub.
Ssenariyə uyğun olaraq, “Həyəcan” siqnalından sonra Dövlət Yanğından Mühafizə Xidmətinin əməkdaşları hadisə yerinə cəlb olunaraq işçilərin təxliyəsini həyata keçirib, şərti yanğının söndürülməsi və ərazidə kəşfiyyat işlərini icra ediblər. Sumqayıt Regional Mərkəzinin xilasediciləri isə şərti yaralıların təhlükəsiz əraziyə çıxarılması əməliyyatını yerinə yetiriblər.
Təlimə Sumqayıt şəhər Dövlət Yanğından Mühafizə İdarəsi və Sumqayıt Regional Mərkəzinin ümumilikdə 7 texnikası və 38 nəfər şəxsi heyəti cəlb olunub.
Sonda keçirilən təlimin nəticələri təhlil olunub, iştirakçılara müvafiq tapşırıqlar və tövsiyələr verilib.
Bu gün, 13:27
7
