Sovet dövrünün tanınmış dissidenti, hüquq müdafiəçisi, Rusiya Konstitusiyasının müəlliflərindən biri Sergey Kovalyov 91 yaşında vəfat edib.
Sumqayit.tv xəbər verir ki, bunu onun oğlu İvan Kovalyov feysbuk səhifəsində yazıb.
“Atam avqustun 9-da səhər tezdən vəfat edib”, - o bildirib.
Qeyd edək ki, Sergey Adamoviç Kovalyov 1930-cu il martın 2-də Ukraynanın Sum vilayətinin Seredina-Buda rayonunda anadan olub. O, keçmiş SSRİ-nin tanınmış siyasi dissidenti, insan hüquqları hərəkatının fəal iştirakçısı olub. Rusiyanın tanınmış ictimai-siyasi xadimlərindən biri idi.
S.Kovalyov “Memorial” İnsan Hüquqları Cəmiyyətinin sədri, Rusiya “İnsan Hüquqları İnstitutu” təşkilatının prezidenti olub.
Xatırladaq ki, o, 2002-ci il fevralın 21-də Bakıda səfərdə olarkən Azərbaycan Milli Məclisinin üzvləri ilə görüşüb. S.Kovalyov Azərbaycan cəmiyyətinin demokratikləşdirilməsi prosesi və Ermənistanın təcavüzü nəticəsində ev-eşiyindən didərgin düşmüş soydaşlarımızın hüquqlarının pozulması barədə azərbaycanlı həmkarlarının məlumatını dinləyərək, bildirmişdi ki, Rusiyanın Qarabağ münaqişəsi ilə bağlı mövqeyi, təəssüf ki, o qədər də qüsursuz deyil: “Dövlət Duması mənə səlahiyyət verməsə də, haqq qazandırmağa çalışmayacağam və yalnız üzrxahlıq edə bilərəm”.