Sumqayıt şəhərinin 19-cu məhəlləsində yaşayan sakinlər ərazidə vəhşi heyvanların, xüsusilə tülkülərin görünməsi ilə bağlı narahatlıqlarını ifadə edirlər.

Sakinlərin Sumqayit.tv-yə verdiyi məlumata görə, vaxtilə Su İdarəsinin istifadəsində olmuş, hazırda isə fəaliyyət göstərməyən və baxımsız vəziyyətdə qalan hasarlı ərazidə son bir aydan artıq müddətdir ki, 2-3 tülkü məskunlaşıb. Bildirilir ki, heyvanlar vaxtaşırı hasarı aşaraq yaşayış məhəlləsinə daxil olur, daha sonra yenidən həmin əraziyə qayıdırlar.

Müraciətdə qeyd olunur ki, tülkülərin yaşayış sahələrinə yaxınlaşması xüsusilə uşaqların təhlükəsizliyi baxımından sakinləri narahat edir.

Sakinlər bildirirlər ki, əvvəllər həmin əraziyə narkotik istifadəçilərinin toplaşması ilə bağlı hüquq-mühafizə orqanlarına müraciət olunub və polis tərəfindən operativ tədbirlər görülərək problem aradan qaldırılıb. Hazırda isə onlar tülkülərin ərazidən götürülməsi və məsələnin həlli üçün hansı quruma müraciət etməli olduqlarını bilmədiklərini deyirlər.

Məsələ ilə bağlı aidiyyəti qurumların mövqeyini öyrənməyə çalışacağıq. Sakinlər isə problemin diqqətdə saxlanılmasını və müvafiq tədbirlərin görülməsini xahiş edirlər.

14-06-2026, 15:13 99