Bakıda özəl liseydə müəllimi güllələməkdə təqsirləndirilən yeniyetmənin ev dustaqlığına buraxılması ilə bağlı vəsatət təmin edilməyib.

Sumqayit.tv xəbər verir ki, Bakı Ağır Cinayətlər Məhkəməsində hakim Vüqar Quliyevin sədrliyi ilə keçirilən prosesdə təqsirləndirilən şəxsin anket məlumatları dəqiqləşdirilib. Məlum olub ki, yeniyetmə 2010-cu ildə Sumqayıt şəhərində anadan olub və burada qeydiyyatdadır. O, hazırda Bakıda fəaliyyət göstərən “İdrak” liseyinin 10-cu sinif şagirdidir.

Məhkəmə iclasında yeniyetmənin qanuni nümayəndəsi qismində anasının iştirak etdiyi bildirilib.

Təqsirləndirilən şəxsin vəkili Rəşad Mirmehdizadə onun yetkinlik yaşına çatmadığını əsas gətirərək məhkəmə baxışının qapalı keçirilməsi və həbs qətimkan tədbirinin ev dustaqlığı ilə əvəz olunması barədə vəsatət qaldırıb.

Vəkil çıxışında bildirib ki, yeniyetmə törətdiyi əmələ görə peşmandır, zərərçəkmiş tərəflə barışıq əldə olunub və onun müsbət xarakterizə olunduğunu təsdiqləyən sənədlər məhkəməyə təqdim edilib.

Zərərçəkmiş şəxsin nümayəndəsi də vəsatətə etiraz etməyərək tərəflər arasında barışığın əldə olunduğunu bildirib.

Bununla belə, məhkəmə vəsatəti təmin etməyib və yeniyetmənin həbsdə qalmasına qərar verib.

Növbəti məhkəmə prosesi iyulun 1-nə təyin olunub.

Qeyd edək ki, hadisə bu ilin fevralın 6-da paytaxtın Binəqədi rayonunda yerləşən özəl “İdrak” liseyində baş verib. Məlumata görə, məktəbdə şagird tərəfindən odlu silahdan atəş açılması nəticəsində müəllim xəsarət alıb.

Faktla bağlı Binəqədi Rayon Prokurorluğunda cinayət işi başlanılıb. Təqsirləndirilən şəxsə Azərbaycan Respublikası Cinayət Məcəlləsinin 29 və 120.2.2-ci (xuliqanlıq niyyəti ilə adam öldürməyə cəhd) maddələri ilə yekun ittiham elan olunub.

Bu gün, 13:17 9