15 İyun – Milli Qurtuluş Gününə həsr olunmuş “Qurtuluş Kuboku – 2026” minifutbol turniri yekunlaşıb.

Sumayit.tv xəbər verir ki, turnir Sumqayıt Səhiyyə İşçiləri Həmkarlar İttifaqı Şurasının təşəbbüsü, Sumqayıt Tibb Mərkəzi və Abşeron-Xızı Regional Gənclər və İdman İdarəsinin dəstəyi ilə təşkil olunub. Yarışın bağlanış və mükafatlandırma mərasimi keçirilib.

Mərasimdə Sumqayıt Tibb Mərkəzinin direktor müavini Ramin Qasımov, Azərbaycan Respublikası Səhiyyə İşçiləri Həmkarlar İttifaqının sədr müavini Qönçə Abdullayeva, Abşeron-Xızı Regional Gənclər və İdman İdarəsinin rəis vəzifəsini müvəqqəti icra edən, rəis müavini Rüfət Mahmudzadə və Sumqayıt Səhiyyə İşçiləri Həmkarlar İttifaqı Şurasının sədri Elmira Quliyeva iştirak ediblər.

Çıxışlarda Milli Qurtuluş Gününün Azərbaycan dövlətçiliyi tarixində mühüm əhəmiyyət daşıdığı vurğulanıb. Bildirilib ki, bu cür idman tədbirləri səhiyyə işçiləri arasında həmrəyliyin gücləndirilməsinə, sağlam həyat tərzinin təşviqinə və kollektivlərarası əməkdaşlığın inkişafına töhfə verir.

Səkkiz komandanın mübarizə apardığı turnirin yekun nəticələrinə əsasən Təcili Tibbi Yardım Xəstəxanasının komandası III, 3 nömrəli Şəhər Xəstəxanasının komandası II, 1 nömrəli Şəhər Xəstəxanasının komandası isə I yerə layiq görülüb.

Qalib və mükafatçı komandalara kubok, medal və diplomlar təqdim olunub.

Tədbirin sonunda təşkilatçılar yarışın keçirilməsinə dəstək göstərən qurumlara, iştirakçı komandalara, hakimlərə və bütün təşkilatçılara təşəkkür ediblər.

“Qurtuluş Kuboku – 2026” turnirinin əsas məqsədi səhiyyə işçiləri arasında dostluq münasibətlərinin möhkəmləndirilməsi, sağlam həyat tərzinin təşviqi və idmana marağın artırılmasıdır.

13-06-2026, 21:03 108