Sumqayıt şəhəri növbəti dəfə ölkə əhəmiyyətli idman yarışına ev sahibliyi edəcək.
Sumqayit.tv xəbər verir ki, Azərbaycan Milli Paralimpiya Komitəsinin təşkilatçılığı və Gənclər və İdman Nazirliyinin dəstəyi ilə ilk dəfə paraüzgüçülük üzrə Azərbaycan çempionatı keçiriləcək.
Yarış iyunun 18-də Əmək və Əhalinin Sosial Müdafiəsi Nazirliyinin tabeliyində fəaliyyət göstərən Sumqayıt Paralimpiya İdman Kompleksində baş tutacaq.
Çempionatda 30-a yaxın paraüzgüçü 9 kateqoriya üzrə mübarizə aparacaq. İştirakçılar müxtəlif növlər üzrə bacarıqlarını nümayiş etdirərək ölkə çempionu adı uğrunda yarışacaqlar.
Yarışın əsas məqsədi əlilliyi olan şəxslərin idmana cəlb edilməsini təşviq etmək, onların idman bacarıqlarının inkişafına dəstək vermək və gələcəkdə Azərbaycanı beynəlxalq arenalarda təmsil edəcək yeni paraüzgüçülərin yetişdirilməsinə töhfə verməkdir.
Milli Paralimpiya Komitəsinin məlumatına görə, ilk dəfə təşkil olunan ölkə çempionatı milli komandanın potensial üzvlərinin müəyyənləşdirilməsi, yeni istedadların üzə çıxarılması və paraüzgüçülük üzrə ehtiyat idmançı bazasının formalaşdırılması baxımından mühüm əhəmiyyət daşıyır.
Qeyd edək ki, Sumqayıt Paralimpiya İdman Kompleksi son illər ölkədə paralimpiya hərəkatının inkişafına mühüm töhfə verən idman mərkəzlərindən biri kimi fəaliyyət göstərir.
Bu gün, 17:14
7
