Sumqayıt şəhərində fəaliyyət göstərən 7 nömrəli müntəzəm marşrut xəttinin sürücülərindən biri ilə bağlı növbəti şikayət daxil olub.

Sumqayit.tv-yə müraciət edən vətəndaşın sözlərinə görə, 17 iyun 2026-cı il tarixində, saat 18:21 radələrində qeydə alınan videogörüntülərdə 50-AF-337 dövlət qeydiyyat nişanlı avtobusun sürücüsünün sərnişinlərlə dolu nəqliyyat vasitəsini idarə edərkən yol hərəkəti qaydalarını kobud şəkildə pozduğu iddia olunur.

Müraciət müəllifi bildirir ki, sürücünün etdiyi təhlükəli manevrlər həm avtobusda olan sərnişinlərin, həm də digər hərəkət iştirakçılarının həyat və sağlamlığı üçün ciddi təhlükə yaradıb.

Redaksiyamıza təqdim olunan videogörüntülərdə də avtobusun təhlükəli şəkildə idarə olunduğu iddia edilir.

Şikayətçinin sözlərinə görə, bu hal yalnız bir sürücüyə aid deyil. O iddia edir ki, 7 nömrəli marşrut xəttində fəaliyyət göstərən bəzi sürücülər tərəfindən yol hərəkəti qaydalarına mütəmadi əməl olunmur və bu da sərnişinlərin haqlı narahatlığına səbəb olur.

Məsələ ilə bağlı qarşı tərəfin mövqeyini dərc etməyə və aidiyyəti qurumların rəsmi açıqlamasını yayımlamağa hazırıq./Patrul.az

18-06-2026, 23:25 79