Bu ilin yanvar-may aylarında Azərbaycandan 124 min 028 ton azot gübrəsi ixrac edilib.

Sumqayit.tv xəbər verir ki, Dövlət Gömrük Komitəsinin məlumatına görə, ixrac olunan məhsulun ümumi dəyəri 53,5 milyon ABŞ dolları təşkil edib.

Ötən ilin eyni dövrü ilə müqayisədə azot gübrəsinin ixrac dəyəri 2,2 dəfə, həcmi isə 32,2 faiz azalıb.

Qeyd edək ki, Azərbaycanın əsas qeyri-neft ixrac məhsulları sırasında yer alan azot gübrəsinin ümumi qeyri-neft ixracındakı payı 1,04 faiz təşkil edib.

Azərbaycanda istehsal olunan karbamidin əsas hissəsi Sumqayıt Kimya Sənaye Parkında fəaliyyət göstərən “SOCAR Karbamid” zavodunun payına düşür. 2019-cu ildə istifadəyə verilən müəssisə ildə 650-660 min ton karbamid istehsal etmək gücünə malikdir.

Zavodda istehsal olunan məhsulun təxminən 70 faizi xarici bazarlara ixrac olunur. Müəssisə həm ölkənin qeyri-neft ixracının artırılmasında, həm də Sumqayıtın sənaye potensialının gücləndirilməsində mühüm rol oynayır.

Xatırladaq ki, bu ilin ilk beş ayında Azərbaycanın xarici ticarət dövriyyəsi 20,8 milyard ABŞ dollarına çatıb. Bu məbləğin 13,97 milyard dollarını ixrac, 6,82 milyard dollarını isə idxal əməliyyatları təşkil edib.

16-06-2026, 17:11 74